Djokovic a lungawi

Novak Djokovic chuan kumin a hman dan chu duhthusam a nih thu a sawi a, tennis season a hman tawh zingah chuan bul a ṭan fuh ber ṭum ni hiala a hriat thu a sawi.

Serbian tlangval hian January thla tir khan an ram chu ATP Cup-ah hlawhtlinna a chanpui a, Grand Slam hmasa ber Australian Open-ah champion lehin; kar hmasa mai khan Dubai Duty Free Tennis Championship nomawi a chawi leh tawh bawk.

World number 1 Djokovic chuan, "Tuna ka dinhmunah hian ka lawm tawk, ka chhut dan chuan kum bul ka ṭan fuh berte zinga mi a la ni. A bik takin hard court-ah ka khel ṭha zual, inkhelh nuam ka tih berna hmun pawh a ni reng a ni," a ti.

Season kal laiah Djokovic hian match 18 khel tawhin hnehna a chang vek, 2011 season khan a match hmasa 43 zet a lo chak tluang tawh; record a siam kum hian French Open semifinal-ah Roger Federer a ngam lo thung.

Chak zawn rei record a siam aṭanga kum kua a liam hnuah pawh Djokovic a la ṭha reng. Serbian tlangval chuan, "Khel ṭha tur chuan taksa a fit ṭhat a ngai a, rilru put hmang a dik a ngai bawk. Tunah chuan engtiang chena rei nge ka kal theih tih a pawimawh," a ti.

March 9 aṭang hian Indian Wells an khelh leh dawn a, April 5 aṭangin Miami Masters 1,000 an khel bawk ang. United States rama inelna pahnihah hian Djokovic hi inlan a tum, a hnu lamah chuan clay court season a hmang ang.