Rublev leh Shapovalov an tlang

Dubai Tennis Championship khelh laiah Andrey Rublev leh Denis Shapovalov te chuan quarterfinal an invaw kai a, beisei aia inelna hmang ṭha Lloyd Harris pawhin a zin kawng ngaihnawm a la chhunzawm zel.

Seeded pahnihna Rublev-a'n a khingpui Taylor Fritz hneh turin darkar hnih deuhthaw a mamawh, inkhel thunun chungin 6-3, 6-1 in hnehna a chang a, a match lehpekah Marton Fucsovics nen an inhmachhawn leh ang.

Fucsovics hian seeded 11-na Dusan Lajovic chu 6-1, 4-6, 6-4 in a lo hneh ve thung. Quarterfinal-a inhmachhawn tur pahnih hi tun thlatir khan Rotterdam Open final-ah an intawng tawh; an intawn hnuhnung berah hian Russian tlangval Rublev a chak.

Inkhel dangah Shapovalov chuan 6-4, 6-3 in Hubert Hurkacz a hneh a, seeded pathumna hian Karen Khachanov 6-7 (3), 6-4, 6-4 a hnehtu Jeremy Chardy a hmachhawn ve leh thung dawn a ni.

Qualifier aṭanga invaw kai Harris pawh a la chak zel. Seeded pakhatna Dominic Thiem pawh hneh tawhtu hian seeded 14 Filip Krajinovic chu 7-6 (5), 6-4 in a hneh a; Japan tlangval Kei Nishikori nen semifinal lut tur zawk an chingfel leh ang.