Bayern tan harsatna a awm lo
Allianz Arena-ah Bayern Munich-in Robert Lewandowski leh Eric Maxim Choupo-Moting te goal hmangin Lazio 2-1 in an hneh a, first leg-a an chakna nen Champions League champion lai hian Italian club hi 6-2 zetin an sawp.
Bayern-in a vawi 19 nan Champions League quarterfinal an lut a, Barcelona (18) an tlak tawh bawk avangin Bavarians hian UCL-a quarterfinal lut hnem ber a ni.
Lewy bawk
Bayern Munich an khelh tawh chuan goal khungtu zingah Robert Lewandowski hming a lang ṭhin a, Lazio leh Bavarians inkhelh ṭum pawhin a danglam lo.
Polish striker Lewy hian minute 33-nah Francesco Acerbi laka Leon Goretzka penalty hlawhchhuah chu goal-ah a chantir. Kum 32 mi Lewandowski hian Champions League bikah penalty aṭanga vawi 13 a khungna a ni.
Lewy hian season liam ta ṭantirh aṭang khan Champions League-ah goal 20 leh assist vawi nga a nei tawh a, season hnih chhungin Europe-a inelna sang berah hian goal-ah a inrawlh hnem ber. Bavarians striker hian tun season inelna hrang hrangah goal 39 a khung tling tawh!
Minute 71-naah Lewandowski hi Choupo-Moting-a'n a rawn thlak a, PSG striker hlui hian minute 73-naah Bavarians goal hnihna a rawn khung nghal. Lazio-in minute 82-naah subsitute Marco Parolo hmangin siphurh an sut ṭhen a, result a tih danglam phah lo.
Eng nge an sawi?
Bayern head coach Hansi Flick chuan, "Lazio-in goal an venghim ṭha a, chutichung chuan chak kan phu. Goal kan chhuah leh hram kha pawi. Chutihrualin kan goal bawh a nat em avangin kan khingpuite chance an nei ve leh ṭhin. Mahse hei hi kan khelhtir duh dan a ni miau si," tiin attacking football khelh nuam a tih thu a sawi.
Lazio boss Simone Inzaghi chuan, "Chak lo mah ila ka player-te an khelh danah ka chhuang hle. Team ṭhenkhat lakah hi chuan a inkhelh ve theih ṭhin lo a, Bayern hi chutiang team zinga mi chu a ni," tiin a sawi.
Tute nge intum dawn?
UEFA Champions League quarterfinal draw chu vawiin tlai dar 4:30 hian Nyon, Switzerland-ah neih a ni dawn. Team pariat te chu Bayern Munich, Chelsea, Borussia Dortmund, Liverpool, Manchester City, Paris St-Germain, FC Porto leh Real Madrid te an ni.
UEFA Champions League quarterfinal draw chu vawiin tlai dar 4:30 hian Nyon, Switzerland-ah neih a ni dawn. Team pariat te chu Bayern Munich, Chelsea, Borussia Dortmund, Liverpool, Manchester City, Paris St-Germain, FC Porto leh Real Madrid te an ni.
Quarterfinal chinah hi chuan seeded an awm tawh lo a, ram khat team pawh an inhmachhawn thei vek tawh. Chumi awmzia chu English club pathum Chelsea, Liverpool leh Manchester City te hi inhmachhawn thei vek an ni.
Chutiang bawkin Bayern leh Dortmund inkhel Der Klassiker (German Clasico) pawh thleng thei a ni a, Lionel Messi telna Barcelona leh Cristiano Ronaldo telna Juventus an tel tawh lo chungin UCL boruak a la nung chho hle.
Quarterfinal first leg (April 6-7) leh second leg (April 13-14) hi April-ah khelh a ni dawn a, semifinal hi April 27-28 (First leg) leh May 4-5 (Second leg) ah khelh a ni ang. Kumin final hi Ataturk Olympic Stadium, Istanbul-ah khelh tur a ni.