Zaninah Man City inlan dawn

Manchester City-in tun season-ah nomawi pali Champions League, Premier League, FA Cup leh League Cup an la chawi thei vek. Zanin dar 11:00 hian Goodison Park-ah Everton hmachhawn turin Pep Guardiola hote an lenglut dawn a, FA Cup quarterfinal a nih tawh avangin team pahnihin inelna an la thu tak ang.

FA quarterfinal-ah hian Premier League club pasarih leh Championship club Bournemouth te an la dam. Inkhel tur pali zingah Pathianni zan dar 10:30-a inkhel tur Leicester City leh Manchester United chu hmuhnawm ber tura ngaih a ni.

Chutihrualin zanin dar 5:45-a Bournemouth leh Southampton inkhel tur leh Pathianni zan dar 7:00-a Chelsea leh Sheffield United inkhel tur pawh hi entlak viau turah a ngaih theih bawk.

City an ṭha fal?
Premier League aṭanga teh chuan Manchester City an ṭha fal a, match 30 aṭangin point 71 an hmu tawh a, pahnihna Manchester United-in point 57 chauh an la hmuh avangin Pep Guardiola hote hi champion ngei turah a ngaih theih tawh.

Amaherawhchu zanina an inkhelna tur erawh FA Cup a ni a, vanduai theih a ni. City khingpui tur Everton hi vanduai theihna tur khawpin an ṭha tawk a, manager tawnhriat nei ṭha Carlo Ancelotti enkawl a nih bawk avangin engpawh a thleng thei ang.

Man City-in player inhliam an nei tawh a, Nathan Ake pawh chhawr theihin a awm tawh. Champions League-a Borussia Monchengladbach an hneh ṭumin Sergio Aguero leh Gabriel Jesus te bench-ah an awm a, Everton hmachhawn turin an inpeih ang.

Everton erawh hliam vangin an buai. First keeper Jordan Pickford chu hliam vangin a inlan thei dawn lo a, Robin Olsen dinhmun a chiang lo bawk. Hemi a nih avang hian senior team-a vawi khat chiah la inlan kum 21 mi Joao Virginia chu inlan thei dinhmunah a ding.

Tlarhmaah Bournemouth aṭanga an lak Joshua King chu Cherries tana a inan tawh avangin chhawr theih a ni lo a, amaherawhchu Richarlison leh Dominic Calvert-Lewin te an awm avangin a khel phak lo hrim hrim. Everton hian an mualah Man City barakhaih an tum dawn a ni.

Foxes Vs United
Leicester City leh Manchester United te intluk tawk zia sawifiahna chu Premier League table a ni a, tun dinhmunah Foxes hian point khat chiahin an pha lo.

Brendan Rodgers-a hote hian match hnuhnung berah Sheffield United 5-0 in an sawp a, hemi ṭum hian goal khung khawl Jamie Vardy-a'n goal a khung lo zawk. United tana thu lawmawm erawh Foxes hian inhliam vangin player pawimawh James Maddison leh Harvey Barnes te an chhawr theih a rinawm loh.

Ole Gunnar Solskjaer-a hoten FA Cup leh Europa League-ah nomawi chawi an la inbeisei a, Norwegian manager hnuaiah a vawi khat nan nomawi an chawi dawn a nih chuan Foxes hi an hneh ngei a ṭul dawn a ni.