Chelsea boruak a ṭha

Thomas Tuchel-a hnuaiah Chelsea-in match 14 an khel tawh a, hneh loh an la tawng lo. Blues hian March 21, Pathianni zan dar 7:00 hian Sheffield United an mikhual ang.

London club hian Champions League-ah Atletico Madrid an pet chhuak a, Stamford Bridge-ah team boruak ṭhatzia a lang. Squad-a tel lo Thiago Silva, Mason Mount leh Jorginho ten East Stand-ah an chak lawmin an inkuah chiam.

Emerson-a goal khung lawmpui turin keeper Edouard Mendy-a'n yard 100 vel a tlan phei a, team boruak a ṭha tih a chiang. Chelsea khingpui tur Sheffield United erawh Premier League table mawngphaha awm an ni a, an manager Chris Wilder an ban hnua an match hmasa berah Leicester City 5-0 in an sawp.

Blades hian Stamford Bridge-ah kum 98 chhung an clean sheet tawh lo a, kum 1992 hnuah chak hmel an hmu tawh lo. Tun hnaia an khelh dan thlirin Chelsea hi chak ngei tura ngaih an ni.