Zanin dar 7:00-ah India Vs England

Ningani zan khan T20 match linaah India-in England an hneh let a, series-ah 2-2 a ni chiah. Zanin dar 7:00 hian Ahmedabad-ah match ngana khelh a ni dawn a, a chak tur zawk zawnna a nih dawn avangin a hmuhnawm ang.

Ṭhumvawrah England an vannei a, vawm hmasak an thlang. Tun series-a vawi thum an khelh tawhah ṭhumvawra chak zawkin hnehna an chan zui vek avangin England dinhmun a ṭha zawkah a ngaih theih.

Amaherawhchu India tan Suryakumar Yadav-a'n run 57 a siam a, Shreyas Iyer (37) leh Rishabh Pant (30) ten an thlawp ṭhat bawk avangin Men in Blue-in over 20-ah run 185/8 an siam. England bat hun a thleng a; Jason Roy (40), Ben Stokes (46) leh Jonny Bairstow (25) te an chet chhiat loh avangin chak turin beiseina an nei.

Over tawp berah England-in run 23 an mamawh a, India tan Shardul Thakur-a'n a vawm. Jofra Acher-a'n run li leh run ruk a vawi chhuak a, Thakur a talbuai avangin vawi hnih a vawm wide zui. India ṭantute hlauthawn hman mah se Thakur a insiamṭha a, Chris Jordan a vawm out bakah ball tawp berah run siam a tir lo. 

England-in over 20-ah run 177/8 an siam a, India-in run riatin hnehna an chang. England captain Eoin Morgan chuan, "Keini aiin an khel ṭha zawk a, chak an phu zawk," a ti. India captain Virat Kohli pawhin, "Team ṭha tak lakah kan che ṭha a, Suryakumar Yadav (man of the match) a khel ṭha bawk," tiin an khelh danah a lawm thu a sawi.