Chak mamawh Ramhlun SC

Mizoram Super League season 6 kal laiah Ramhlun Sporting Club chuan match hnih khel tawhin hneh an la nei lo, zanin dar 6:30 hian Hawla Indoor Stadium, Republic Vengthlangah Tuikual South nen an inhmachawn ang.

Tuikual hian an match hmasa bera Chawnpui an hneh hnuin Zarkawt BCA nen an inkhel tawk hle, champion lai hi point hnih chauhin an ngam lo - season hmasa finalist TSBC hian zaninah a vawi hnih nan chak an tum dawn.

Tuikual South hian visa a fel har avangin match hmasa pahnihah Darrel Steven Bowie an chhawr hman lo, Amercian power forward hi tunah chuan a rawn thleng tawh - captain F. Zodinthara te nen an khel ho tur chu hmuh chakawm tak a ni. Phengphehlep coach C. Lalrohlua chuan, "Bowie hian player a ti phur zual a, nuamti takin Ramhlun lakah kan khelh chhuah theih ka beisei, chak kan tum ang," tiin Vanglaini a hrilh a, tualchhung player a rintawk thu a sawi bawk.

Zarkawt BCA an ngam loh hnuah Ramhlun hian Chanmari Vikings an ngam lo zui, match hmasa ai chuan a hnuhnungah hma an sawn tih a lang. Zanina an hmachhawn tur Tuikual lakah chak ngei an duh a, semifinal khelh an duh a nih chuan chak an mamawh bawk.

BCA laka point 33 neitu PC Lalramtiamnghaka'n point 33 ngawt nei thei mah se Vikings hmaah a tham ral. Ramhlun North tlangval hi TSBC hmaah a thawh leh a pawimawh dawn a, Australian player Edan Hymas chungah mawhphurhna sang zawk a awm bawk ang.