Mbappe awmna PSG chak chiang

Kylian Mbappe-a hattrick hmangin Paris St-Germain chuan Lyon 5-1 in an sawp a, French champion hian a zawna a kum nga nan French Cup final an lut.

Nizan khan semifinal pakhat zawkah St-Etienne leh Rennes te an inhmachhawn a, result kan hre hman lo. Rennes hian season hmasa khan PSG hnehin nomawi an chawi - April 25 hian a hmawr bawkna neih a ni ang.

Mualneitu Lyon lamin Martin Terrier hmangin minute 11-na lekah goal hmahruai an khung a, he goal hi mikhual Paris St-Germain chhaih thinrimtu mai a ni - an nawr letna an tuar zo lo.

Goal luh aṭanga minute thum hnuah Mbappe chuan si phurh a sut a, chawlhlawk hma chuan goal dang a luh belh lo. Second half minute 61-ah Lyon defender Fernando Marcal chu yellow card vawi hnihna hmuh vangin hnawhchhuah a ni.

Penalty aṭangin Neymar-a'n hmahruaina a khung a, a hnu lamah rawlthar duhawm Mbappe chuan goal hnih a neih belh bakah hun tawp dawn hnaiah Pablo Sarabia chuan an goal ngana a khung bawk.

Paris St-Germain coach Thomas Tuchel chu a naute khelh danah a lungawi, a bik takin tlarhma lam an inkawp fuh chu lawmawm a ti hle. German manager chuan, "Tun hnaiah Mbappe hi a khel ṭha zual, a kawppui tura Neymar a awm leh chiah hian an hlauhawm zual a ni," a ti.

Tun hnai season nga chhung chu PSG hian French Cup final an lut vek, a zawna vawi li an champion hnuah nikum khan Rennes an ngam lo; kuminah pawh champion tura rinkai ber an ni leh mek. Ligue 1 lamah pawh PSG hi an kal fawr hle, anmahni hnaih bertu Marseille lakah point 13 zetin hma an hruai fal mek. League Cup-ah pawh final an lut tawh, April 4 hian Lyon nen nomawi an inchuh ang.