Covid-19 vangin F1 dinhmun a chiang lo

Formula 1 thuneitu lam chuan an team emaw driver emaw zingah coronovirus vanga ram dang luh harsatna an nei an awm a nih chuan inelna an neih loh tur thu an sawi, car intlansiakna sang ber hi season ṭan a nih hmain an boruak a chiri rih hle.

F1 managing director Ross Brawn chuan, "Team luh an phal lo a nih chuan, chumi ramah chuan inelna kan nei lo ang. Inelna a awm a nih chuan a fair thei dawn lo, chuvangin kan tlan lo ang," tiin an ngaihdan chiang takin a sawi.

Brawn chuan sawi zawmin, "Ram ṭhenkhatin an rama lut tur an endik uluk leh ṭhenkhat luh an phal lo hi dem ngawt theih an ni chuang lo. Hri leng lakah an ram venhim an duh vang a ni a, intlansiak pawh neih an duh tho, chuvangin buaina pumpelh dan ṭha ber kan ngaihtuah zel ang," a ti.

Vietnam chuan Italy aṭanga khualzin kal turte chu an thil tih tur ni tak hma ni 14-ah an ram thleng turin an duh a, tun hnaiah Bahrain pawhin ram hrang hrang aṭanga lut turte chu uluk taka a endik bakah Vietnam ang bawkin ni 14 hmalama thleng turin an ti. F1 season thara inelna hmasa ber tur chu March 13-15 chhung hian Melbourne-ah Australian Grand Prix tlan a ni ang. Bahrain leh Vietnam Grand Prix te hi inelna pahnihna leh pathumna tura ruahman a ni.

MotoGP lam chuan inelna an neih tur hmasa pahnih chu an lo ṭhulh tawh, car intlansiakna Formula 1 pawhin buaina an tawk dawn tih chu a chiang tawh a, Australian Grand Prix bak hi chu an neih theih a rinawm rih loh.