Mizoramin probable squad puang
Mizoram Football Asso-ciation chuan nimin khan Santosh Trophy 2020 khel tur Mizoram probable squad an puang. Mizoram hian a vawi khat nan kumin hian football hmanga state inelna lian ber final round a thleng dawn.
Santosh Trophy final round hi April 14-27 hian Aizawlah khelh a ni dawn a, India ram aṭangin football thiam state 10 - Delhi, Goa, Jharkhand, Karnataka, Kerala, Meghalaya, Mizoram, Punjab, Services leh West Bengal te an inlan ang.
A awlsam lo
Mizoram hian September 22-26, 2019 chhung khan Agartala, Tripura-ah qualifying round an khel a; Tripura, Arunachal Pradesh leh Assam te nen group khatah an awm. Group pakhat aṭangin team khat chauhin final round an luh avangin chetsual theih a ni. Mizoram hian an khingpui pathum an hneh vek a, amaherawhchu an chakna zat erawh goal khat chauh zel a ni a. Match hmasa berah Arunachal Pradesh 1-0 in an hneh a, Tripura leh Assam 2-1 ve vein an hneh leh bawk.
Dr T Aoa champion
Manager T. Vanlalhluna leh coach R. Lalremtluanga hote hian final round an luh hnuin kumin January thla khan Dr T Aoa Trophy an hmachhawn a, Santosh Trophy final round inpuahchahna a ni nghal. Mizoram hi Dr T Aoa Trophy-ah a vawi thum nan an champion a, final-ah group stage-a an hneh loh Sikkim 1-0 in an hneh a. Semifinal-ah Mizoram hian inelna thlengtu Nagaland an hneh bawk.
Mizoram squad chu
Santosh Trophy khel tur hian player 25 thlan an ni a, player panga an paih leh dawn. Goalkeeper-ah player pahnih Lalmuanawma leh Lalmuansanga te chauh an thlan avangin an tling chiang tawh.
Defender leh midfielder pakua ve ve thlan an ni a, forward panga thlan an ni bawk. Mizoramin Santosh Trophy a thlen hmasak bera Mizoram aiawh tur hriatthiam a har hle. Kum 2014 khan Mizoram hi a vawi khat nan Santosh Trophy-ah an champion a, tun ṭumah hian F. Lalrinpuia, David Lalrinmuana, Lalfakzuala, Lalbiakhlua leh Lalrinzuala te chauh an awm tawh a ni.
Hluna thukhawchang
Mizoram manager T. Vanlalhluna chuan, "MFA-in min thlawp ṭha a, team thawhhona a ṭha a, training pawh a nuam khawp mai. Kan coach Remtluanga hi a thawkrim em em a, final round kan luh theih nan leh Dr T Aoa Football-a kan champion theih nan pawh a ṭangkai hle," tiin Vanglaini a hrilh.
MPL hmasa bera Dinthar FC champion puitu Hluna chuan, "Tun ṭumah hian senior player kan ko nual a, kan lawmna em em chu naupang zawkte entawn tlakin kum lama upate an thawkrim. Mizoram hian engtik hunah nge Santosh Trophy final round hi a thlen leh dawn a hriat loh a, chuvangin tun ṭuma champion hi a pawimawh a ni," tiin a sawi. Mizoram team hian final round atan hian February 24
aṭang khan training an ṭan a; T. Vanlalhluna, R. Lalremtluanga leh Anand Gurung te kaihhruaina hnuaiah an thawkrim hle.
S.No. Hming Club Veng/Khua
Goalkeeper
1 Lalmuanawma Mizoram Police FC Khawbung
2 Lamuansanga Electric Veng FC Bethlehem Vengthlang
Defender
3 P.C. Laldinpuia Electric Veng FC Samthang
4 Lalrinchhana Tochhawng Chanmari FC Mamit
5 Vanlalzuidika Chhinga Veng FC Pukpui
6 Lalhmunmawia Mizoram Police FC Hualngohmun
7 Lalrinzuala Mizoram Police FC Aizawl Venglai
8 K. Lalmalsawma Electric Veng FC Bethlehem Vengthlang
9 Lalremruata Chhinga Veng FC Khawruhlian
10 Lamawizuala Chhinga Veng FC Nisapui
11 Vanlalnghenga Chanmari FC Serchhip
Midfielder
12 David Lalrinmuana Chanmari FC Zemabawk North
13 H. Lalbiakthanga Mizoram Police FC Kawnpui
14 R. Malsawmtluanga Mizoram Police FC Darlawn
15 Lalchungnunga Chhinga Veng FC Zotui
16 M.S. Dawngliana Chanmari FC Bawngkawn
17 Lalruatfela Chanmari FC Republic Veng
18 Vanlalthanga Venghnuai FC Hualngohmun
19 Lalsawmzela Chhinga Veng FC Champhai
20 K.C. Larchhuakmawia Chhinga Veng FC Cherhlun
Forward
21 Malsawmfela Mizoram Police FC Ramhlun South
22 F. Lalrinpuia Mizoram Police FC Republic Veng
23 Lalfakzuala Mizoram Police FC Armed Veng
24 Lalbiakhlua Mizoram Police FC Keifang
25 Vanlalthlamuana Chawnpui FC Ramhlun South
Coaching Staff
Manager T. Vanlalhluna, Dinthar
Coach R. Lalremtluanga, Venghnuai
Asst. Coach Anand Gurung, Tanhril
Physio Eddie Zorinmawia, Zotlang