Zarkawt BCA an chungnung
Mizoram Super League season 6 kal laiah inkhel hmuhnawm bik kan hmu, champion lai Zarkawt BCA chuan Khatla TBL chu 90-85 a hnehin match thum an khelh tawhah an chak vek, point ruk hmuin hmahruaitu an ni.
Nilaini zan Hawla Indoor Stadium, Republic Vengthlanga inkhelah team ṭha pahnih an inkhel tawk, hun pangngai - 4th quarter thleng khelh zawh a nih hnuah 79-79 a ni a, over time khelh niin BCA lamin point 11 an neih belh laiin TBL erawhin point ruk chauh an nei thung.
Table-a pahnihna Khatla TBL hian March 10, Thawhlehni zanah Tuikual South an hmachhawn leh dawn a, hmahruaitu BCA hi March 7, Inrinni zanah Chawnpui BC nen an inkhel thung ang.
En tham Price Martin
March 4, Nilaini Vanglaini chhuakah khan Malik Price Martin chu eng ang taka ṭha nge a ni tih Khatla TBL lakah a lang ang, tih ziak a ni a, a chhanna chu double-double; point 43 leh rebound 10 a ni.
American player hian Tuikual South lakah point ngah thawhkhat mah se a laka beiseina a san avangin a 'turu' tawk lo a ni mai thei. A match hnihnaah erawh hun pawimawh laiah point a hmu thei a, cool dap maia freethrow vawi 13 zinga pariat a lut te chu a pawimawh hle.
Zonunsanga hming lam hmaih theih a ni lo. Ramthar Veng tlangval hi hnam dang player angin a pumrua lian tawk lo deuh mah se court chhungah chuan a palian ve tawk, point 20 leh rebound vawi 11 a neih hi a tam, a tawp lamah awmze nei taka hun pawh muan dan a thiam bawk.
TBL tan a uiawm
Khatla TBL coach Lalrinzuala'n BCA hneh theih a inring a, a naute khelh dan thlir chuan a beiseina hi a mak lo. Match hmasa pahniha point 30 chuang ve ve nei thei Xavier Dupree-a'n BCA lakah point 22 a nei a, nidang a phak lo deuh.
Tawnhriat nei ṭha H. Laldinsanga leh Vanlalnunsanga inlan loh zanah TBL player che ṭha fal an awm lo a, Moses Zorema leh Lalhmachhuana te khel ṭha pangngai mah se team chakpui turin a tawk zo lo. MSL season hmasa pahnih champion TBL hian Season Opening Tournament 2020 leh MBBA Cup-ah BCA hi an ngam lo, inelna sang berah an ngam loh zui avangin a vawi thum nana MSL champion an duh a nih chuan BCA hneh dan an ngaihtuah chhuah a ngai.