Bayern champion zanah Robbery an langsar

Bundesliga-ah Bayern Munich bawk an champion a, Bavarians hian Inrinni zan khan Eintracht Frankfurt chu an mual Allianz Arena-ah 5-1 in an sawp. 'Robbery' tih hminglem an pek Arjen Robben leh Franck Ribery ten an match hnuhnung berah goal an khung ve ve a, Niko Kovac hnuaia an nomawi hmasa ber a ni.Bayern Munich hian a zawnin vawi sarih league nomawi an chawi. Bavarians hian bundesliga title vawi 29 an lakna a ni a, German football-ah ro an rel chhunzawm zel.A awlsam loNiko Kovac-a hoten league match hmasa 12 zawhah point 12-in Borussia Dortmund an pha lo nghal a, champion lo thei dinhmunah an ding.Amaherawhchu, Bavarians hian season tawp lama Dortmund chetsual avang leh an intawn hnuhnung ber ṭumin an elpui hi 5-0 a an sawp avangin match hnuhnung berah hian pakhatna ni turin point khat chiah an mamawh tawh.Bayern tan Kingsley Coman-a'n minute lina lekah a khung a, first half tawp hma hretin Leon Goretzka chu inhliam vangin thlak a ngai. Second half-ah Sebastien Haller-a'n (50') Frankfurt tan siphurh a sut. Bavarians-in goal dang an chhuah leh chuan inkhel dangah Borussia Dortmund-in Borussia Monchengladbach lakah hma an hruai avangin champion lo thei dinhmunah a ding. Bayern dinhmun ṭhaa an din theih nan David Alaba (53') leh subsitute Renato Sanchez (58') ten an khung. Niko Kovac-a'n hlauhthawnna tur a nei tawh lo a, Ribery leh Robben te bench aṭangin a luhtir. Kum 37 mi Ribery hian minute 72-naah mawi zetin a khung a, amah aia kum hniha naupang Robben-a'n team thawhrah sengin goal a rawn khung ve bawk. Bayern Munich ṭantute an champion avangin an lawm a, club legend pahnihin an khung avangin an lawm lehzual.Season tawpa Bayern chawlhsan tur Rafinha erawh khelmualah a inlan ve lo a, kum 33 mi Brazilian right back hian tun Inrinni zana RB Leipzig nen DFB Pokal final an khelh hunah inlan hun a la nei thei ang.Mr WembleyBayern Munich-in kum 2013-a an treble champion ṭumin Robben-a'n Champions League final-ah chakna goal a khung a, an hmelma Borussia Dortmund an hneh hmun hi Wembley Stadium a nih avangin Dutch winger hi Mr Wembley tih hming an vuah.PSV, Chelsea leh Real Madrid te an league ṭheuha champion pui tawhtu Robben hian 2009 khan Bayern hi a zawm a, Bundesliga nomawi pariat zet a chawipui tawh avangin German club-ah hian hmun pawimawh tak a chang reng tawh ang.Nomawi pakuaFranck Ribéry-a'n Robben aiin Bayern a zawm hmasa a, French winger hi Bundesliga nomawi vawi kua chawi thei hmasa ber a ni. Marseille player hlui chuan, "Kum hnih thum lek a ni lo a, kum 12 tal tawp helai hmunah hian ka awm. Ka tan chuan kum 2013-a kan treble champion kha helai hmuna ka hun tawn ropui ber a ni," tiin a sawi.Ribery hian Bayern kawr ha chunga Bundesliga match hnuhnung ber a khelh lai thlir tur hian France aṭangin a nupui fanau bakah a nu leh pa te, a nupui nu leh pa te leh a cousin thlengin a chhah a. Allianz Arena-ah Bundesliga champion an lawm ho a ni.Goal khung thei LewyRobert Lewandowski-a'n Eintracht Frankfurt lakah khung lo mah se tun season Bundesliga-ah goal 22 khungin amah hnaih bertu Dortmund forward Paco Alcacer aiin goal liin a khung tam zawk.Bundesliga top scorer hi 'kicker Torjagerkanone' (kicker top scorer cannon) tih a ni a, Lewy hian he chawimawina hi vawi li a dawnna a ni.