Zidane-a'n Bale hma hun a hre lo

Pathianni zan khan Real Madrid chuan an season duhawm lo tak chu hlimawm lo takin an khar a, an mikhual Real Betis chu an league match hnuhnung berah 0-2 in an ngam lo.He inkhelah hian Real Madrid chhuahsan tur anga sawi awm reng Gareth Bale chu bench-ah dah tluan a ni a, inkhelh zawhah Zinedine Zidane chuan a player hma hun a hriat loh thu a sawi. March-a Madrid boss ni tura lo kir leh Zidane chuan, "Khelhna hun a chang lo hi pawi ka ti a, mahse eng thil nge thleng zel dawn tih erawh kan sawi thei lo. Ka ruahmannaah player chu a tel rem loa ka hria a nih chuan ṭha ber tura ka ngaih anga kal mai a fuh a ni. "Bale hian he team tan hian hna ropui tak a lo thawk tawh ṭhin a, mahse coach ka nihna angin tun hunah hian ka chet a ngai si," tiin a thutlukna chu tun hun atana ṭha tur a nih thu a sawi. Hetihlai hian Real Madrid president hlui Ramon Calderon chuan, "Bale tan cham zel hi thil theih loh tluk a ni a, sum tam tak hloh pawhin Real hian a chhuah an duh dawn a, loan pawh an pawiti lo ang," a ti. Bale hi a club hlui Tottenham Hotspur nen sawi zawm mek an ni a, mahse Welsh forward hian kar khatah £350,000 a hlawh mek avangin Spurs tan hei hi buaina a ni thei ang - tun dinhmuna an player hlawh hnem ber Harry Kane chuan kar khatah £200,000 a hlawh.