Italian Serie A boruak a 'hot' hnuhnawh Player ṭha ber Cristiano Ronaldo
European League lian dang an khel zo tawh a, Serie A-ah pawh Juventus an champion chiang tawh. Mahse, Italian football inelna sang ber hi match khat khelh hmabak a la awm a, season thara Champions League khelh tuma inum boruak a 'hot' thar hle.Pathianni zan khan Serie A mimal lawmman hrang hrang semna neih nghal a ni a, Juventus forward Cristiano Ronaldo chu Player of the Year atan thlan a ni. Portugal international hlui hian England leh Spain-ah player ṭha ber lawmman a lo dawng tawh bawk a, heng ram lian pathumah hian a club a champion pui vek a ni.Mangṭha Allianz StadiumZirtawpni khan Juventus chuan an manager Massimiliano Allegri chu season tharah an manager a nih chhunzawm tawh loh tur thu an tichiang. Pathianni zan khan Juventus leh Atalanta 1-1 in an inhnehtawk a, season nga chhunga nomawi 11 chawipuitu Allegri tan Juve manager nichunga Allianz Stadium bika a match hnuhnung ber a ni.Allegri bakah season tawp ruala chawl tur kum 38 mi Andrea Barzagli tan match hnuhnung a ni - Serie A Team of the Year a vawi li tel tawh Barzagli hi a teammate-te'n zahna chibai buk chungin an mangṭha bawk.Italian manager Allegri chuan, "Ajax nen kan inkhelh zawh hnu khan club president nen kan inbia a, hna chhunzawm zel turin ruahmanna kan siam. Mahse, hun rei lote chhungin boruak a inthlak danglam."Ningani tlai khan meeting kan nei a, hna ngai ka thawk rei tawh dawn lo tih ka hria. Zirtawpni khan ka chawlh tur thu hi hriattir ka ni. Juve-in hma a sawn zel theihna tur nia an hriat anga thutlukna an siam hi kei chuan a ṭha zawk turah ka ngai," a ti.UCL ticket inchuhSerie A match 37 an khelh hnuah Juventus leh Napoli ten season tharah Champions League an khel dawn tih a chiang a, hmunruak dang luah khat tur pahnih erawh match hnuhnung berah chinfel a ni ang - Atalanta (66 points) leh Inter Milan (66) te chu an hma hun an kutah a innghat a, pangana AC Milan (65) leh parukna AS Roma (63) tan pawh beisei tur a la awm.Kartawp inkhelah Inter hi Napoli lakah 4-1 in an tlawm a, palinaah la inhamtang rih mah se an match hnuhnung bera an hmachawn tur Empoli hi 17-na nilai an ni a, tla thei china awm Genoa nen an inkarah point khat chiah a awm avangin hmachhawn an hautak dawn hle.Gennaro Gattuso enkawl Milan-in Frosinone 2-0 in an hneh thung. Italian champion vawi 18 ni tawh Milan hian an match hnuhnung berah SPAL an hmachhawn dawn - Milan hian pathumna Atalanta aiin head-to-head record an neih ṭhat zawk avangin beiseina a sang zual ang