Domestic treble champion Man City

Manchester City chuan Inrinni zan khan Watford 6-0 a sawpin FA Cup-ah an champion. Pep Guardiola hote hian Premier League leh Carabao Cup nomawi chawi tawh bawkin English football-a nomawi chawi theih pathum season khata la thei hmasa ber an ni.Wembley Stadium-ah Man City tan David Silva-a'n minute 26-naah goal hmahruai a khung a, hemi hnu hi chuan Guardiola hoten inkhel an thunun hlak - Gabriel Jesus leh Raheem Sterling ten goal hnih ve ve khungin Kevin De Bruyne-a'n goal khat a khung ve bawk.Vanneih a ṭulFA Cup final-ah kum 1903 khan Bury-in Derby 6-0 in an sawp a, tun ṭum final hi hemi hnua insawp lehna nasa ber a ni. Man City-in awlsam taka hnehna changin lang mah se goal luh hmain Watford-in ṭum hnih chance ṭha bik an nei a, goal chhuah ngat se chuan inkhel kalhmang a dang thei ang.Watford midfielder Roberto Pereyra chuan City keeper Ederson chiah a hmachhawn hnuah a ti goal thei lo a, Abdoulaye Doucoure ball petin City captain Vincent Kompany kut per mah se referee Kevin Friend chuan penalty turah a ngai lo. Javi Gracia hote an vanduai a, Man City erawh an vannei thung.  An thiam eMan City inkhel timawitu zinga mi David Silva chuan hun leh hmun chep chu a thiamna leh remhriatna hmanga tizauin minute 26-naah a ke vei lamin goal hmahruai a khung. Minute 38-naah Bernardo Silva chuan Gabriel Jesus hmu fuh ringawt loin duhthusama ṭhain ball a vawrh lut a, Brazilian forward hian goal khung nan a hmang.Watford-in goal an mamawh tawh avangin goal venhim ringawt chu hna berah an nei thei tawh lo. Counter attack-ah pawh Man City a la ṭha hlei hlei a, Kevin De Bruyne chuan minute 61-naa a hun ṭha neih chu keeper bum nan hmangin goal thumna a khung.Minute sarih hnuah KDB-a'n amah siamtu Jesus chu siam letin Brazilian forward hian a goal hnihna a khung. Man City-in goal li an khung hnuah inkhel an thunun hlak a, Watford tan chelh rual an ni lo. Raheem Sterling chuan minute 81-na leh 87-naah a ti goal a, team hnathawh ve ve a ni.Treble a tawk loPep Guardiola hnuaiah Manchester City-in season liam ta khan Premier League leh League Cup nomawi an chawi a, tun season-ah nomawi pahnih humhim ve vein FA Cup an chawi belh bawk.Spanish manager Guardiola chuan, "A tira ka sawi tawh ang khan season tawpa min tehna tur chu Champions League a ni a. He inelnaa kan champion hma chu a tawk dawn lo," tiin domestic treble champion ni mah se an tum ram an thlen loh thu a sawi.Barcelona manager hlui chuan sawi chhunzawmin, "Barcelona ka enkawl khan ka vannei a, kum li chhungin vawi hnih kan champion. Hei vang hian mi tam takin danglam bikah min ngai a, Champions League nomawi hi ka lakah an beisei tlat a ni. Man City nomawi chawi leh record hi a ropui a, Champions League erawh nomawi dang nena khaikhin a rem lo. A chhan chu team tel an ṭha a, inelna a hautak em em a, champion ngei erawh kan duh," tiin a sawi.