Djokovic hnehin Nadal a champion

Rafael Nadal chuan Novak Djokovic hnehin a vawi kua nan Italian Open nomawi a chawi a, tun season-a clay court bika a champion-na hmasa ber a ni.Pathianni zan Rome khawpuia inkhelah Nadal hian darkar hnih leh minute 25 chhungin 6-0, 4-6, 6-1 in hnehna a chang a, Masters 1000 Series titles lak hnem lamah Djokovic nen record inṭawm an neih chu khumin nomawi 34 a la tling chiah.Kum 32 mi Nadal chuan, "Roland Garros a hnai tawh a, a hunah tak inbuatsaihna ṭha tak ka neih theih avangin a lawmawm hle. Tunah chuan Paris lam rilruah a awm tawh a, a vawi 12 nan champion ka tum dawn, inkhelh hlan ka nghakhlel tawh hle," tiin French Open atana a inpeih tawh thu a sawi.Grand Slam vawi 17 champion tawh Nadal hian beisei angin season a hmang ṭha tawk lo, mahse Italian Open nomawi a chawi avangin phurna a nei thar - May 26 aṭanga khelh tur French Open hi Nadal inkhelh thiam bikna hmun a nih avangin player dang tan a huphurhawm khawp ang.Hmeichhe singles inelna lamah seeded palina Karolina Pliskova chuan Britain nula Johanna Konta 6-3, 6-4 a hnehin nomawi a chawi ve bawk. Czech Republic nula hi tun hma lamin Rome-ah semifinal a khelh hnuhnung paliah semifinal a paltlang miah lo - tun ṭumah erawh a hun a inher chhuak ve ta a ni.