Chhingcows an vanduai, Trau an champion

2nd Division League-ah Chhinga Veng chuan Inrinni khan RG Stadium-ah Lonestar Kashmir FC 6-1 in an sawp a, amaherawhchu Pathianni khan Trau FC-in Ozone FC 2-1 a an hneh avangin Mizo club beiseina a tawp. Manipur club Trau hian match nga khelhah point 15 an hmu a, match khat khelh hmabak la awm mah se umpha theitu an awm tawh loh avangin an champion. Chhingcows erawh pahnihnaah an lungawi a ṭul thung.Chhinga Vengin beisei nei chungin Lonestar Kashmir FC an mikhual a, Gagandeep Singh-a'n minute 32-naah an lamah an tihluh avangin Mizo club dinhmun a ṭha. Chhingcows tan MS Dawngliana'n goal hnih khungin PC Laldinpuia, Vanlalbiaa Chhangte leh Lalliansanga ten goal khat ṭheuh an khung.Lalsangzuala Hmar hoten I League beisei nei chhunzawm turin Ozone FC kutah an innghat a, Bengaluru club hian Trau FC lakah point an hlawhchhuah a ngai. Manipur club-in an mualah Princewill Olariche Emeka hmangin an khung hmasa a, Ozone-in CS Sabeeth hmangin minute 88-naah sut mah se Trau tan Joseph Mayowa Olaleye-a'n injury time-ah chakna leh champion-na goal a khung.Mizo club hian league round-ah Trau FC chungah awmin pakhatna an ni a, awlsam takin final round an lut. Amaherawhchu, an chawlh rei avangin final round-a Trau FC nen an match hmasa ber an inkhelhin an inpeih hman lo. RG Stadium-ah Chhinga Vengin 3-1 in Manipur club an hneh lo a, match hmasa ber an khelh fuh loh vangin Mizo club hi pahnihnaah an lungawi a ṭul ta a ni.