F1 legend Lauda a thi
Formula 1 vawi thum champion tawh Niki Lauda chu nimin zing khan a thi a, kum 70 mi a ni.Austrian driver hlui hian Ferrari car a khalh laiin 1975 leh 1977 khan a champion a, McLaren team a zawm hnu 1984-ah nomawi a chawi leh bawk. 1976 German Grand Prix-ah khan chesualin na takin a kang a, mahse a dam hnuah intlansiak a hmachhawn leh thei.Nikum August thla khan Lauda hi a chuap thlak sak (lung transplant) a ni. A kum a tam tawh bakah beisei angin a ṭha chhuak mai lo. A chhungte chuan, "Kan hmangaih Niki chu thlamuang takin a chawl hahdam," tiin a thih thu an puang.Lauda hian car intlansiakna lama hming a chher hnuah pawh hna dang a thawh chhunzawm, airline entrepreneur a nih bakah Formula 1 Mercedes team tan non-executive chairman a ni. Mercedes-in Lewis Hamilton an lakluh theih nana tha thawhtu pawimawh a ni - British driver hi world champion vawi nga a ni ta hial a ni.