GSW-in Blazers hnehin NBA Finals an thleng

Golden State Warriors chuan nimin zing khan Portland Trail Blazers 119-117 a hnehin Western Conference Finals series 4-0 in an la a, tun hnai season nga chhung chu a zawnin NBA Finals an thleng thei a ni.Warriors hian Milwaukee Bucks leh Toronto Raptors te inkhela chak zawk nen nomawi an inchuh ang. Tukin hian Eastern Conference Finals lamah Bucks leh Raptors te hian game 4 an khel ang, Bucks hian series-ah 2-1 in hma an hruai mek.NBA team awm tawh zingah Warriors hi a zawna season nga chhung NBA Finals khel thei pahnihna an ni. 1957-1966 inkar khan Boston Celtics chuan a zawnin vawi 10 an khel a, ṭum kua ngawt nomawi an chawi.BeiseinaGame hmasa pathumah Golden State lamin hnehna an chang vek a, nimin zing Moda Center, Portland-a inkhelah pawh hliam Stephen Curry awmna team hi chak tura rinkai zawk an ni.Mahse, Raptors lamin thapui an thawh. Terry Stotts-a enkawl team hian hnehna chan pawh an inbeisei sang hman hle. Chawlhlawk laiin 69-65 in hma an hruai a, quarter thumna tawp lamah pawh 95-78 in an sang zawk.Hun tawp nan minute li leh second 34 chauh a awm tawh tihin Curry-a lay up mawi tak hmangin Warriors lamin 104-104 in an nihrual. Hun pangngai tawpah pawh 111-111 a an inhnehtawk avangin over time khelh a ngai.A thlawn mai mawTeam pahnih an inkhel tawk a, chak zawk tur hriatthiam a har. Over time khelh zawh nan second 39 chauh a awm tawh tihin Draymond Green-a'n 3-points vawm lutin Warriors chu 119-115 in hma a hruaipui.Blazers tan Damian Lillard-a'n lay up hmanga 2-points neiin beiseina a chhem nung a, Curry-a'n a hun ṭha a hloh hnuah Lillard bawkin 3.3 chauh awm tawhah vanneihna zawng leh mah se a lut lo. Golden State basket venghim turin Green leh Klay Thompson ten hun tawp lama an tha thawh chu fak an phu.Meyers Leonard-a'n minute 40 a khelh chhungin point 30 a nei a, NBA bika a point hmuh hnem ber ṭum a tawn bakah Lillard-a'n point 28 a neihte chu Blazers tan hnehna chan nan a tawk zo lo a, an beiseina chu boruakah a thamral.A awlsam loHnehna an chan hnuah Golden State Warriors coach Steve Kerr a ṭawng uang duh lo. Kerr chuan, "Kum 1960 hnu lamah a zawna NBA Finals vawi nga luh hi a thleng leh tawh ngai lo, tun ṭuma kan thlen chin hi hriatreng a nih ngei ka beisei. Hetiang thleng tur hian kawng harsa tak kan paltlang a ni," tiin a sawi.Warriors hian hliam vangin an star player Kevin Durant an la chhawr thei lo. Durant awm lo mah se Curry-a'n a theihna tak a pho chhuak zel a, American guard hian 37 points, 13 rebounds leh 11 assists a nei. Curry ang bawkin Green-a'n 18 points, 14 rebounds leh 11 assists neiin triple-double a  nei ve bawk.NBA playoff bikah Curry leh Green te hi team pakhat tana khel rual triple-double nei thei hmasa ber an ni a. Triple-double an tih hian - points, rebounds, assists, steals leh blocks a eng emaw ber pathumah double-digit (10 chin) neih phak vek a ngai a, a harsat avangin an ngai hlu hle.