Rii & Hawla Inter Village Football Kanan an thiam ber

Champhai DFA hnuaia inelna lian leh ngaihhlut ber Rii & Hawla Inter Village Football Tournament 2019 chu nimin khan khelh zawh a ni a, inkhel inhnehtawk takah Kanan chuan 1-0 a Vengthlang hnehin a vawi khat nan an champion.Chhangphut Field-a inkhelah goal a lut hma, minute kuana lekah tun inelna bika goal 13 khung thei Ramdinthara chuan ding lam sir aṭangin Vengthlang tlarhnung khum chiahin a vawrh lut a, ven loha awm Malsawmdawnga chuan 'cool' takin a lo khung - keeper Lalthuammawia Ralte tan dan hman a ni lo. Tun inelna bikah Kanan hi an khel ṭha tluang a, goal khung an theih bakah an tlarhnung phui ṭha chu an chakna hnar pawimawh a ni. An veng tlangval Lalchhawnkima leh Lalnunpuia te an ding khawng, Kanan tlanghnung hian Isaac Lalrinngheta, Fela Zote leh Jessie Lalmawizuala te inkawp chu an veng tluan thei.Kanan hian nomawi chawi turin match ruk an khelh aṭangin goal 33 ngawt an khung a, anmahni lamah goal hnih chiah a lut thung - champion an phu. Chak lo Vengthlang lamin tualchhung football boruak tih nun thar tumin thapui an thawh a, an duh ber nomawi chawi phak rih lo mah se veng mipui thlawpna an dawng ṭha hle.