India chakpuitu Lalremsiami

Indian Women’s Hockey Team chuan Thawhṭanni zan khan South Korea nen an test match hmasa ber an khel a, an mikhualna ramah 2-1 a hnehna changin India goal hmasa zawk hi Lalremsiami Hmar khung a ni.National Athletic Center, Jinchun-a inkhelah Siami'n minute 20-naah goal hmahruai a khung. Minute 40-ah Navneet Kaur chuan India goal hnihna khungin mikhual team hi dinhmun ṭha takah a dah a, hun tawp dawn lama Shin Hyejeong goal khungin result a siam danglam phak tawh lo.India leh South Korea te hian test match vawi thum an khel dawn, vawiin hian an match hnihna an khel leh nghal ang. India coach Sjoerd Marijne chuan, "Ka naute an khel ṭha, hei aia rang leh dik zawkin khelh chhuah kan tum ang," tiin hmasawn zel an tum thu a sawi.Tokyo Olympic 2020 atan India nulate hi an inbuatsaih mek a, kumin kumtir lam khan Spain leh Malaysia-ah te tour an nei tawh bawk. Tun ṭuma Korea nena an inkhelh hi June 15-23 chhunga khelh tur FIH Women’s Series Finals atana in enchhina pawimawh tak a ni tel bawk ang.Kolasib nula Siami hi India tan an zin chhuahnaah hian player pawimawh a ni zel. Malaysia an zin ṭum phei chuan hliam vangin captain Rani Rampal a kal lo. Rani awm loh karah Siami hian match nga an khelhah goal a khung vek.