Fury leh Wilder nakkum lamah?

British boxer rothap Tyson Fury chuan world heavyweight title inchuha Deontay Wilder nen an inhnek nawn hun tur chu nakkum March emaw April a nih tur thu a sawi a, an inhnek hun nghakhleltu te tan chuan a rei deuh mai thei. 

Wilder hian Pathianni zing khan Dominic Breazeale chu awlsam takin round khatna lekah a knockout a, WBC title a kawl lai chu a humhim. Inhnek zawhah hian Wilder-a agent Shelly Finkel chuan a boxer hian Fury emaw Anthony Joshua chu nakkumah a hmachhawn ngei tur thu a lo sawi tawh. Kum 30 mi Fury chuan, "Wilder hi a tlanchhe reng thei lo ang. He fight hi a thlen ngei a ngai a ni," tiin a sawi a, an buaina chu US broadcaster hran ve vea contract an neih hi a ni. Wilder hi Showtime nen an thawkdun mek a, Fury hian a hnu lawkah ESPN-ah contract thar a ziak a, Joshua hi DAZN streaming service nen an thawkdun thung. 

Fury chuan, "Fighter-te hi an in hmachhawn duh tak tak a nih chuan eng vangin nge an thawhpui network te hian kawng an dal kher ang? Joshua hian hei hi chhuanlamah a hmang nasa ṭhin a, mahse fighter pahnihin fight an duh tak tak a nih chuan a thleng mai ang," a ti. Wilder hian WBC kawnghren a kawl mek a, world heavyweight-a kawnghren ngaihhlut hlawh dang WBA, IBF leh WBO chu Joshua hian a kawl thung. Joshua hian June 1-ah Andy Ruiz Jr chu New York khawpuiah a hmachhawn dawn a, Fury hian June 15-ah Tom Schwarz a hmachhawn dawn bawk.