Raptors leh Bucks intiat tawk

NBA Eastern Conference Finals-ah chungnung zawk an la awm thei lo. Nimin zing game 4 inkhelah Toronto Raptors chuan Milwaukee Bucks 120-102 in an hneh a, best of seven series-ah 2-2 in an inhnehtawk chiah - Zirtawpni zing dar 6:00-ah game 5 khelh a ni ang.

Scotiabank Arena-a inkhelah Raptors point guard Kyle Lowry-a'n point 25 score-in a team a chak pui a, a point neih zinga 18 ngawt chu first half chhunga a neih a nih avangin an chungnun theihna chhan langsar a ni.Game 3-a hliam tenau tuartu Kawhi Leonard a inlan zui thei a, kum 27 mi hian point 19 a nei thei a. Raptors coach Nick Nurse chuan, "Minute a khel hnem tawh em em a, player dang ang bawkin a chau tawh a ni.

Hliam nei mah se game 4 khelh hma khan a dinhmun a ṭhat hman avangin kan lutir," tiin a sawi.Bucks pair Khris Middleton leh MVP ni tura rinkai ni pha Giannis Antetokounmpo te pahnih point belhkhawm chu 55 a tling leh a, mahse an team chakpui turin a tawk zo lo. Regular season bika hnehna chang hnem ber Bucks hi season kal laia a vawi hnih nan a zawnin an tlawm. Game hmasa pahniha an chak hnuin Toronto muala an chhuah hnuah reslt ṭha an nei thei rih lo.

Bucks coach Mike Budenholzer chuan, "Basket venhim lamah kan thawk ṭha tawk lo. Kan khingpuite khan ball an inpe kual hnem a, hmun ruak an hmu hnemin an duh ang taka shot-na hun kan siam hnem. Match lehpekah chuan inpumkhatna ṭha zual zawk kan mamawh ang," tiin a sawi.Eastern Conference regular season-ah Bucks hi pakhatna an ni a, an hnuai chiahah Raptors an awm thung - team inel tawk tak an nih avangin NBA Finals-a Golden State Warriors hmachhawn tur zawk hriatthiam a la har hle.