Casillas nupuiin cancer a vei

Spanish legend Iker Casillas-a'n 'heart attack' vanga buaina a tawh aṭanga kar thum a liam hnu lawkah a nupui Sara Carbonero chuan chanchin lawmawm lo a nei ve leh ta a, chhul cancer a neih thu an puang. 

Sara chuan cancer natna a vei thu hi instagram lamah pho chhuakin, "Casillas hun tawn avanga kan mak tihna pawh a reh hmain thu lawmawm lo takin min deng leh ta a, he natna thumal ziahchhuah pawh hi ka la harsat cheu a ni," a ti. Spanish journalist lar Sara chhul cancer hi paih erawh a ni tawh a, mahse Casillas nupui chuan inenkawl tura hun tam zawk an la mamawh tur thu a sawi. 

Sara chuan, "Zai ka ni tawh a, vanneih thlak takin ka natna hi kan hre chhuak hma hlauh a ni. Mahse inenkawl dam turin thla engemaw zat ka la mamawh dawn a, engkim a ṭha vek ang tihah erawh ka inringtawk hle. "Zinkawng hautak em emin min hmuak tih ka hria a, mahse a tawpna erawh duhawm taka kan khar ka beisei tlat a ni," tiin dam leh tura theihtawp a chhuah tur thu a sawi a, "Ka chhung, ṭhian leh medical team ṭha takte thlawpna ka hmu ṭha hle a ni," a ti bawk. Hetihlai hian Real Madrid aṭanga kum 2015-a Porto pantu Casillas chuan a natna avanga chawl tura anga an sawi chu a pha rih a, "Engtik emaw chen chu ka chawl hahdam ang," tiin chawlh erawh a lak rih tur thu a sawi.