Lianzuala & Apuia telna India inlan dawn
Zanin dar 7:15 hian India chuan international friendly match khel turin Oman an hmachhawn dawn a, India team-ah Lallianzuala Chhangte leh Lalengmawia (Apuia)-te chu Mizo player awm an ni.
India coach Igor Stimac-a'n mahni 'level' pui hmachhawn aiin team ṭha zawk hmachhawna Blue Tigers thuam ṭhat a duh a, hei vang hian Oman hmachhawn hi a awlsam dawn lo. Blue Tigers hian Covid-19 vangin international match an khel thei lo reng a, Oman nena an inhmachhawn tur hi November 2019 hnua India-in international match a khelh leh hmasa ber tur a ni.
Maktoum Bin Rashid Al Maktoum Stadium, Dubai-ah team pahnih hi an inkhel ang a, March 29 zan hian Zabeel Stadium, Dubai khawpuiah vek India hian team ṭha United Arab Emirates chu friendly match an khelhpui leh ang.
Chhetri tel lohna
Covid-19 vangin India chhuanvawr Sunil Chhetri-a zin ve thei lo a, ram tan match 115-a khelha goal 72 khung thei striker hmun ruak hi hnawhkhah a har dawn.
Chhetri tih loha India striker langsar ber tih ngam Jeje Lalpekhlua'n hliam a neih hnuah ngai a la awh leh lo tih ISL-ah a lang bawk si a, tlarhmaah India-in tawnhriat chhuan tham nei striker a kawl lo. India-in tlarhmaa chhawr theih a neihte hi ATK Mohun Bagan striker Manvir Singh, Goa striker Ishan Pandita leh Hyderabad forward Liston Colaco-te an ni.
Manvir Singh hian season hman zawh takah khan league match 23 khelin goal ruk a khung a, assist vawi thum a nei. Ishan Pandita-a'n ISL-ah minute 131 chiah a khel chungin goal li a khung a, Liston hian match 19-ah goal hnih khungin assist vawi thum a nei.
Tichuan...
India striker-te season hman dan enin Chhetri an la phak lohzia a lang a, Bengaluru FC striker hian season hman zawh takah khan league match 20 khelin goal riat a khung a, assist vawi hnih a nei.
Stimac-a'n 4-2-3-1 formation a rin ber thu a lo sawi tawh a, a player-te a khelhtir dan ṭhin pawh a ni. Mahse, tuna India striker-te hi ISL khelh zawh takah khan mual sir aṭanga goal nawr tura an hun tam zawk hmangte an ni. Croatian coach hian 4-2-3-1 a hmang leh a nih chuan tlarhmaa maltlat turin Manvir Singh-a'n rin a hlawh berin a rinawm a, a hnung chiaha lo thlawp turin Anirudh Thapa a awm thei ang - Pandita leh Colaco-ten a laia khelh an harsat mai thei.
Midfield laiah Rowllin Borges leh Lalengmawia chu inkawp tura ngaih an ni a, mual sir aṭanga tlarhma pui turin Lallianzuala Chhangte, Bipin Singh, Halicharan Narzary leh Ashique Kuruniyan-te ho an awm a, Stimac-a hausakna lai tak a ni.
Tlarhnung
Stimac-a'n a squad-ah goalkeeper pali ngawt ko mah se Gurpreet Singh Sandhu bawk chu si ban a nghah tir leh a rinawm a, tlarhnung laiah Sandesh Jhingan leh Chinglensana Singh-te chu inkawp tura ngaih an ni.
Right back-a khel turin Ashutosh Mehta leh Pritam Kotal an awm a, mual vei lam sirah tawnhriat nei ṭha Mandar Rao Dessai leh rawlthar ṭhangduang Akash Mishra chu an inel a rinawm. Hetihrual hian India inkhel tur hi friendly match a ni tih hriat tel a ṭha a, Stimac-a'n inenchhin nan a hmang dawn - tawnhriat nei ṭha leh player ṭha zawk an lut kher lo thei tihna a ni.
Lallianzuala Chhangte chuan, "Inenchhinna ang deuha hman tur a ni a, khel tur pawh hriatthiam a la har rih khawp mai," tiin Vanglaini a hrilh.
An naupang
India squad-ah player 27 an awm a, an vaia kum chawhrual hi 24 a ni. Kum 20 la tling lo player pahnih an awm a, kum 19 mi Akash Mishra leh Jeakson Singh-te an ni.
Kum 25 hnuai lam player hi 12 an awm a, Mizo player Lianzuala (23) leh Lalengmawia (20)-te pawh kum 25 hnuai lam zingah an tel. Lianzuala hi kum lamah la nau deuh mah se tawnhriat lamah erawh a nep lo a, India tan vawi 11 inlan tawhin goal li a khung tawh - Apuia erawh India camp-a a vawi khat awmna a ni thung.
India coach Stimac chuan, Kum 19, 20, 21 leh 23 bawr vel national team-a kan hmu hi thil lawmawm tak a ni. FIFA Under-17 World Cup aṭang khan team din a, an hriatna puntir kan tum a ni," a ti.
Oman thlirna
FIFA ranking-ah India hi 104-na a ni a, an hmachhawn tur Oman hi 81-na an ni thung. India-in international match a khelh hnuhnung ber November 19, 2019 khan Oman nen hian World Cup qualifier an khel a, Reds (Oman sawina) hi 1-0 in an chak. India leh Oman hi vawi kua an intawng tawh a, Oman-in vawi sarih hnehna an chan laiin India-in chak an la nei ve lo - vawi hnih an inhnehtawk.
Oman-in India lamah vawi 22 zet goal an khung tawh a, India-in goal nga chiah an la khung ve thung - thawnthu hlui keu let chuan India tan lawmna tur a awm lo a, zaninah thawnthu her danglam an tum ang. Reds coach hi Branko Ivankovic a ni a, Croatian coach hian Dinamo Zagreb leh Shandong Luneng-te chu league nomawi a lo chawipui tawh a, World Cup khel turin Iran a lo hruai thleng tawh bawk - a tawnhriat a nep lo hle.
Vanglaini Biangbiakna
Team ṭha hmachhawn hi kan mamawh ber a ni a, chak lo pawh ni ila inzir belhna tur a tam zawk. Chak ngei tumin kan khel dawn a, Oman hi keini aia an ṭhat fal viauna sawi tur pawh a awm chuang lo.
Theihtawp kan chhuah ang a, team anga kan khelh chhuah theih chuan kan chak em em ang. Pathian zarah keimah lam pawh ka hriselna a ṭha a, hun ṭha pek ka nih chuan inlan turin ka inpeih a ni. Mizo mipuite min lo ṭawngṭaipui turin ka sawm e.
- Lallianzuala Chhangte
Club aiin national team-ah chuan inelna a sang zawk a, a nuam ka tiin a phurawm ka ti khawp mai. Hriselna lamah pawh harsatna ka nei rih lo a, ka dam ṭha e.
- Lalengmawia (Apuia)