Real Madrid-ah Bale a kir leh dawn

Gareth Bale chuan a ngheta Tottenham Hotpur lama awm leh a tum lem lo niin a lang, season tharah chuan a club pangngai Real Madrid tana khelh chhunzawm leh a tum zawk niin a sawi.

Bale hian 2013 khan Spurs aṭanga Real hi pound mkatduai 85 zetin a zawm, a hun lai chuan khawvel player manto ber a ni. Spanish club tan hian hlawhtlinna hrang hrang a chang tawh. Mahse manager Zinedine Zidane nen an inkar a ṭha lo.

Nipui bazar lai khan Bale-a'n a club hlui Tottenham hi loan hmangin a zawm. Jose Mourinho-a'n a tir lamah a chhawr tam bik lo, tun hnaiah erawh a khel ṭha leh tawh hle, tun hma lama a theihna sang tak ang kha a lang chhuak leh dawn ni pawhin a lang.

Wales captain Bale chuan, "Kumina Spurs ka pan chhan chu football khelh ka duh vang a ni. Ram tan Euro ṭha taka ka khelh theih nan chuan inkhelh tam ka mamawh, chumi hnu lamah chuan Real Madrid lama kir leh chu ka tum dan a ni thung," a ti.

Bale hian Real Madrid tan 2022 nipui thleng daih contract a nei mek, hlawh tam tak a lakna club hi chhuahsan mai a tum lo. Chutih rualin Spanish club lian hi Zidane-a'n a enkawl zel a nih erawh chuan Bale tan inkhelh tam a beisei ngam chuang loh ang.