French Open khel lo tur Berdych

Tomas Berdych chu French Open-ah a inlan thei dawn lo. World number 4 hlui hi a hnungzâng na a la dam fel thei lo a, clay court inelna lian ber khelh tum mah se a beiseina chu a thlawn ta rih.

Kum 33 mi Berdych hi season hmasa chawhnu lam aṭang khan a hliam vang hian a buai tawh a, kumin February thla khan inkhel thei ve leh mah se a hliam ngai bawk a chhuah leh avangin a chawlh rih a ngai.

French Open semi­finalist hlui Berdych chuan, "Inelna hma­chhawn ngei tumin Paris-ah pawh ka kal hman. Mahse, 100%-a ka fit tawk loh avangin thutlukna harsa tak chu ka siam a ngai ta a ni.

"Roland Garros hi ka ngaina a, he hmunah hian 2010 khan semifinal hial pawh ka khel ve tawh. Tunah chuan grass court season hmang turin inbuatsaihna ka neih a ngai ta zawk," tiin Wimbledon-ah erawh chuan inlan theih a beisei thu a sawi.

World number 4 hlui Berdych hi a inkhelh mumal loh rei tawh avangin ATP ranking-ah pawh a hnungtawlh nasa tawh hle, Czech Republic tlangval hi world number 100 a ni mek.