Vawiin tlai dar 2:00-ah Exhibition Match

Mizo Professional Footballer Association (MPFA) leh Serchhip XI ten vawiin tlai dar 2:00 hian Serchhip Sports Complex-ah exhibition match an khel dawn. MPFA-ah hian Indian Super League leh I League-a Mizo player ṭha an tel a, kum dangah pawh Mizoram hmun hrang hrangah inkhel tawhin an ngaihlu ṭhin hle.

Serchhip mipui tana thu lawmawm chu MPFA team-ah hian R. Laldanmawia, Lalramchullova leh Brandon VL Remdika te an inlan thei dawn a, Lalrindika Ralte leh F. Lalrozama te an awm sa bawk avangin East Bengal-a Mizo awm player panga an khel vek ang. Mizo zinga FIFA World Cup Under 17-a inlan hmasa ber Lalengmawia (Apuia) pawhin a khelh theih tur thu a tichiang a, en a châkawm sawt.

MPFA hi Mizo legend S.Malsawmtluanga'n a ho thei dawn a, India striker Jeje Lalpekhlua inlan tur ringawt pawh hi inkhel en phahna tham a tling. Mizoram chhungah Mizo player ṭhate inkhel en theihna hun ṭha hi a inhawng meuh lo - Serchhip mipui erawhin Mama leh Jeje bakah Didika Ralte, Robert Lalthlamuana, Zohmingliana Ralte, Lalruatthara, Jerry Lalrinzuala, Malsawmzuala, Isaac Vanmalsawma leh rawlthar duhawm Edmund Lalrindika te inkhel an en thei tur hi an vannei hle.

Serchhip XI-ah pawh tawnhriat nei ṭha tak an awm a, Aizawl FC tana khel mek Lalrinfela chu player langsar a ni a, Bengaluru FC Academy-a inzir mek Lalrinzuala bakah Pune FC Academy aṭanga inzir chhuak Eric Remruatpuia leh Mark Zothanpuia te an awm avangin tualchhung mi tan chuan en a châkawm khawp ang.