Apuia'n NorthEast United a zawm

Mizo zinga FIFA World Cup khel hmasa ber Lalengmawia (Apuia) chuan season thar aṭangin NorthEast United tan a khel dawn a, Guwahati club hi Indian Arrows aṭangin a zawm. 

Kum 2017-a India-in FIFA Under 17 World Cup a thlen khan Apuia hi Blue Tigers rawlthar rual zingah a tel a, group stage match thum an khelhah match hnih a inlan. 

I League atana Indian Arrows din a nih hnuah pawh a cham chhunzawm zel a, mahse I League-a a season hmasa berah coach Luis Norton de Matos hnuaiah hmun a chang tam tawk lo. 

Season hman zawh takah khan coach thar Floyd Pinto enkawlna hnuaiah khelin hmun pawimawh a chang a, league match 11 inlanin goal khat a khung. 

Vaivakawn rawlthar Apuia hi Super Cup-ah pawh Arrows innghahna a nih chhunzawm a, Highlanders chil ti puttu niin ISL club zawm hi a thlang ta a ni.