Dortmund an che na - player pathum an nei nghal!

Borussia Dortmund-in point hnih lekin Bundesliga nomawi ban phak lo mah se season thar an thlir ṭan leh der tawh a, league match tawp ber an khelh aṭanga kar khat pawh a liam hmain  player pathum an lei fel der tawh!

German club hian May 21 khan Germany left back ṭhang­duang Nico Schulz an lalut a, Nilaini zan khan Bundesliga mid­fielder ngaihven hlawh pahnih Thorgan Hazard leh Julian Brandt an lakluh thu an puang zui. Dortmund hian midfielder Christian Pulisic chu pound maktaduai 58-in Chelsea hnenah an hralh a, player pathum hmangin USA international hi an thlak zui. 

Hoffenheim aṭanga an lakluh Nico Schulz hi pound maktaduai 22 man a ni a, Brandt hi pound maktaduai 22.1 a an lakluh laiin Hazard hi pound maktaduai 30 man a ni thung - player pathum lei nan pound maktaduai 74.1 an seng tihna a ni a, Pulisic man aṭanga chhut chuan pound makta­duai 16.1 bak an inseng lo. 

Hazard maw?
Football ngaina chin tan Chelsea forward Eden Hazard hriat loh chi a ni lo a, a nau Thorgan Hazard erawh a u ang ema hriat hlawh a la ni lo - Dortmund hian Bundesliga lama an elpui Borussia Monchengladbach aṭangin an lalut. 

Kum 26 mi midfielder hian tun season-ah inelna hrang hrangah Monchengladbach tan match 35 khelin goal 13 a khung a, assist vawi 12 a nei bawk - Gladbach hi 2014 khan Chelsea aṭangin loan-in a zawm a, 2015-ah a nghetin a lut zui. German club tan inelna hrang hrangah match 182 a khelh sak a, goal 46 khungin assist vawi 44 a nei. Signal Iduna Park-a kum nga chhung cham tura contract ziaktu hian, "Tun hi ka career-a bung thar kai tura ke pen hun tak chu a ni," tiin Dortmund a pan chhan a sawi. 

Dortmund sporting director Michael Zorc chuan, "Hazard hian chawl loin a theihna a pholang reng a ni," tiin Liverpool leh Arsenal nen pawha sawi zawm a player thar hi a fak. 

Reds aiah Dortmund
Premier League season tawp rualin Liverpool leh Julian Brandt in rim anga sawi an ni a, mah se a chanchin thar ber erawh Dortmund a pan thu a ni ta thung - Reds hian first XI an tiam thei lo nia sawi a awm a, Brandt hian Germany-a cham zel a duh hrim hrim tia tarlang an awm bawk.

Kum 23 mi lek nichunga Germany tana vawi 24 inlan thei Brandt hian kum 17 a nihin Bayer Leverkusen tan a league match hmasa ber a khel tawh a, league match 165-ah inlan sak zuiin goal 34 a khung a, assist vawi 41 a nei thei a ni. Tottenham nen pawha sawi zawm Brandt chuan, "Dortmund-in point tlemte chauha league nomawi an chawi thei lo kha he hmun ka pan chhan hi a ni a, hmasawnna tur a awmin ka hria a ni," tiin Dortmund chu league nomawi chawi tura puih a tum thu a sawi. 

Brandt hian Leverkusen tih loh club dang tan a la khel ngai lo a, European football-a hmabak nei êng ber pawl a nih avangin kum nga chhung Dortmund-in an chang thei tur hi an vannei tih loh rual a ni lo. 

Tu nge Schulz?
Dortmund-in an squad din thar an tumna kawnga an lei hmasak ber Schulz hian Germany national team-ah hmun pawimawh a chang chho mek a, kum 26 mi left back, midfield-a khel thei bawk hi a chhe lo ang tih a chiang. 

Hertha Berlin leh Borussia Monchengladbach tan a lo khel tawh ṭhin a, Dortmund tan hian kum 2024 thleng khel turin contract a ziak. Season hman zawh takah khan Hoffenheim tan match 37 a khel a, goal hnih khungin assist vawi kua ngawt a nei! Nikum August khan ram tana inlan tura koh ni ve chauh mah se match rukah a inlan sak der tawh a, defender ni siin heti zat lek match-ah hian goal hnih a khung fel der tawh bawk. 

Germany left-back Schulz chuan, "Dortmund hi club ṭha tak an ni a, an khelh dan nen pawh kan inrem hle. Team tan hian tih theih nei ve niin ka inhria a, anni nen hian ropuina ram kan thlen theih ka beisei," tiin beiseina a neih san thu a sawi.