Raptors tan NBA Finals a hnai

Toronto Raptors chuan a vawi khat nana NBA Finals khel turin match khat bak chak an mamawh tawh lo. Nimin zing khan Milwaukee Bucks chu 105-99 a hnehin Eastern Conference finals series-ah 3-2 in hma an hruai.

Pathianni zingah game 6 an khel dawn a, Raptors hian hnehna an chang zui a nih chuan NBA champion lai Golden State Warriors nen nomawi an inchuh dawn. Bucks lamin game an la ve leh thung a nih erawh chuan May 28 zingah game 7 khelin team pahnih dinhmun an chingfel ang.

Thawhlehna
Eastern Conference Finals game hmasa pahnihah Bucks lamin hnehna an chang a, regular season bika hnehna chang hnem ber team hian harsa lutuk loin Raptors an paltlang mai dawn niin a ngaih theih.

Amaherawhchu, beisei leh rin lawk ang ngawtin thil a kal bik lo. Scotiabank Arena, Toronto-ah game hnih hnehna an chan let ve leh hnuah Fiserv Forum, Milwaukee-ah pawh chak ni hmel an hmu ta! Game 5 inkhel hmuhnawm takah quarter hnuhnung ber an khelh dawnin Bucks lamin 75-72 in hma an hruai thei. Dinhmun hniam zawka ding mek Raptors tan Kawhi Leonard chu a hun takah rawn rahin point 35 a neih zinga 15 ngawt chu fourth quarter bika a neih a ni a, ropui takin a team a chakpui.

Match thum tlawm
NBA Eastern Conference lamah Bucks hian match 60 hnehna chang chungin regular season an khar a, playoff chinah pawh match hnih aia chak loh rei an nei ngai lo. Tun season bikah tun ṭum hi match thum chhung a zawna an tlawmna hmasa ber a ni. Bucks coach Mike Budenholzer chuan, "Match lehpekah chuan Toronto-ah kan inkhel dawn, ka naute hi hnehna chang turin ka ring tawk. Inpumkhat leh inlungrual kan nihna kha a lanchhuah leh ka beisei," a ti.

Point 17 score tu, Raptors guard Kyle Lowry chuan, "Player tinin kan khel ṭha vek, kan kawng zawh hi en let teh u, a ropui a ni," tiin NBA Finals khel thei tura beiseina an insiam dan chu ropui a tih thu a sawi.