Thil thleng thei Serena vs Osaka

Ningani zan khan French Open draw neih a ni a, mipui ngaihven langsar zinga mi chu Serena Williams leh Naomi Osaka te quarterfinal-a an inhmachhawn thei hi a ni.

Player pahnihte hi nikum US Open final-ah khan an inhmachhawn tawh. Japanese nula Osaka-i'n nomawi lian hmasa ber a chawi aiin a chak lo Serena nungchang mawi lo chuan sawi zui a hlawh zawk! 

Grand Slam vawi 23 champion tawh American star Serena tan Osaka hi a ropuina tur hliah khuhtu a ni zui dawn nge, awlsam takin a paltlang zawk tawh ang tih chu hmuh châkawm tak a ni - inhmachhawn tur erawhin quarterfinal an in vuak kai ve ve a ngai.

Major title pahnih la tawh Osaka kawng a awlsam dawn lo. World number 92 Anna Karolina Schmiedlova a hneh a nih pawhin 2017 champion Jelena Ostapenko emaw Grand Slam vawi hnih champion tawh Victoria Azarenka a hmachhawn dawn. Serena erawhin third round hma chuan sulhnu nei ṭha player hmachhawn theih a nei lo.

Hmeichhe singles champion lai Simona Halep-i'n match hmasa berah Australian nula Ajla Tomljanovic a hmachhawn dawn a, Romanian nula hian a inkhelh thiamna clay court-ah inbuatsaihna nei ṭha tawk lo mah se round hmasa lam a paltlang thei a nih chuan nomawi la tura rinkai zingah a awm ang.