Barca tan nomawi pahnihna a hnâi?
Spanish football-a nomawi ngaihhlut hlawh Copa del Rey final chu zanin dar 12:30 hian khelh a ni dawn a, La Liga champion Barcelona leh Valencia an intawng dawn.
Barcelona-in league nomawi an chawi tawh avangin zaninah Valencia an hneh chuan domestic double an chawi dawn tihna a ni a, Valencia tan erawh 2004 hnua nomawi an chawi leh hmasak ber tur a ni ang. Catalan club-in an beisei ber Champions League nomawi an chawi theih loh avangin Copa del Rey chawi tel ngei an duh dawn a, Valencia tan an ropuina ṭhin nei let tura kailawn pawimawh hmasa a ni thung.
Team pahnih inkara danglamna thlen thei tur chu Lionel Messi a ni a, Valencia boss Marcelino chuan a naute hnenah Messi dan dan tur a hrilh tawh niin a sawi a, a player-ten a thusawi an zawm ṭhat leh ṭhat loh a hriat thuai dawn e.
Beiseina leh Valencia
December, 2018-ah kha chuan Valencia hi La Liga table-ah 14-na an ni a, relegation zone aṭanga an himna chu point li chiah a ni - coach Marcelino duhkhawp lohna a sang a, bang tura nawrtu an tam hle.
Mahse, season hmasa La Liga Coach ṭha bera thlan hian theihna sang tak a nei tih a pholang a, season a tawp meuh chuan palina niin Champions League an khel dawn a, Europa League semifinal an thleng a, Copa del Rey final an khel dawn ta bawk.
Valencia hi an phur vanglai tak a ni a, Barca ngam turin an ṭha ve tawk tih an in 'pawm' lai tak a ni ang. Barcelona hian season ṭantirah an duh ber chu Champions League a ni tih pha loin ualau takin an sawi a, mahse Liverpool-in semifinal aṭangin an hnawt chhuak.
Spanish champion hi Anfield-a an hun tawn duhawm lo khan a la kiansan lo a, kha thil thleng kha a ṭha zawnga a thawk let a nih chuan an 'hlauhawm' ang a, an hnualna ata an harh lo a nih erawh chuan Valencia tan hun ṭha a ni ang.
Counter vs attacking
Barcelona-in attacking football mawi tak an pholang ṭhin a, Valencia erawh defensive game khel a, counter-attack-a innghat ṭhin an ni thung - team pahnih khelh dan in ang lo tak an inhmachhawn dawn.
Valencia khawpuia chanchinbu lar Las Provincias-a journalist Toni Calero chuan, "Valencia hi tlarhnung lam ngai pawimawh tak an ni a, counter-attack hmanga an khingpui nawr let an thiam em em bawk. An khelh dan style hi Barcelona-in ṭhiah an harsat chi a ni," a ti.
Calero thusawi thlawp turin tun season-a team pahnih intawn tawhna result a awm. February khan Nou Camp-ah an intawng a, 2-2 in an inhnehtawk. Mestalla-ah pawh 1-1 thoa an inhnehtawk avangin Barca hian Valencia hmachhawn an harsat tih hi phat rual a ni lo.
Valencia tan tun season-a goal 14 khung tawh Rodrigo leh Portuguese winger duhawm Gonçalo Guedes te chet ṭhat a pawimawh dawn a, winger Denis Cheryshev an chhawr thei lo tur erawh channa a ni.
Suarez tel loin?
Copa America-a Uruguay aiawh hman tumin Luis Suarez-a'n tun thla tir khan a khup hliam a zai tir a, tun season-a goal 25 khungtu striker tel loin Barca hi an inlan a rinawm -an hlauhawm nep sawt dawn tihna a ni.
Ṭum dang ang bawkin hliam vangin Ousmane Dembele dinhmun a la chiang lo a, first choice goalkeeper Marc-Andre ter Stegen chu a khup hliam vangin a inlan thei dawn lo chiang bawk. Hliam vang thoin Arthur aiah Arturo Vidal chu inlan tura beisei a ni.
Barca tana chanchin lawmawm erawh Philippe Coutinho leh Nelson Semedo te hliam vanga an chawlh hnuin training an zawm leh tawh a, coach Ernesto Valverde-a'n a duh phawt chuan a chhawr thei ang.
Catalan club tana pawimawh ber erawh Lionel Messi-a'n buaina a nei lo a, Argentine forward hian a ṭhat dan bera a khelhchhuah phawt chuan Copa del Rey champion tura beisei ngam an ni - tun season inelna hrang hrangah match 49 khelin goal 50 a khung!