Serchhipin Exhibition Match an ngaihlu

Serchhip Sports Complex-ah nimin khan Mizoram Professional Footballer Association (MPFA) leh Serchhip XI ten Exhibition Match an khel a, ruah nasa taka a sur chungin entu ṭhahnem tak an pungkhawm.

MPFA tan hian Daniel Lalhlimpuia, S. Malsawmtluanga, Lalrindika Ralte leh Lalawmpuia ten goal khat ṭheuh an khung a, Serchhip XI 4-3 in an hneh. Mualneitu lam tan hian Bengaluru FC-a inzir mek Lalrinzuala Hauhnar-in hattrick a siam.India striker Jeje Lalpekhlua chu khup hliam zai hmabak a nih avangin khaw chhe hnuaiah a inlan lo a, nimin exhibition match-ah hian Chennaiyin striker hian MPFA team hi a enkawl a ni.

MPFA secretary Lalrindika Ralte chuan, "Serchhip DFA leh khaw mipui chungah kan lawm. Kan inkhel an ngai hlu a, ruahsur hnuaia entu ṭhahnem tak an awm avangin kan lawm takzet a ni. Enna aṭanga kan sum hmuh te hi Serchhip chhunga rualbanlo bakah orphanage home-ah kan pe ang," tiin Vanglaini a hrilh.

Serchhip DFA president Zomuana Hnamte chuan, "MPL7 kan thlen ṭum khan ruah a sur a, tun ṭumah a sur leh bawk. Heti chung hian entu ṭhahnem tak an awm ve ve a, Serchhip mipuiin football an tui bakah professional footballer ho an ngai hlu tih a lang a, kan lawm takzet a ni," tiin a sawi ve bawk.