German Cup-ah Bayern an champion
Bayern Munich-in Niko Kovac kaihhruaina hnuaiah Bundesliga leh DFB Pokal nomawi an chawi nghal a, club chairman Karl-Heinz Rummenigge chuan Croatian coach dinhmun a ngheh thu a sawi . Bavarians hian Inrinni zan German Cup final-ah RB Leipzig chu 3-0 in an hneh a, Robert Lewandowski-a'n goal hnih khungin Kingsley Coman-a'n goal khat a khung.
Bayern hian kum 2016 hnua a vawi khat nan DFB-Pokal nomawi an chawi a, tun ṭum hi vawi 19 an champion-na a ni. Final hi Arjen Robben leh Franck Ribery te Bayern kawr haa an inkhelh hnuhnun ber a ni a, club legend thlah nan nomawi an chawi.
Neuer a pawimawh
Berlin-ah Bayern Munich-in goal thum an khung a, inkhel en lo tan chuan awlsam taka chakah a ngaih theih. Amaherawhchu, DFB Pokal final-ah hian RB Leipzig-in bul an ṭan ṭha zawk a, Bayern-in tlarhnung aṭanga in pass chhuah an tum chu Ralf Rangnick-a hoten pressure an pek ṭhat avangin Kovac-a hote an buai hle.
Bayern vanneihna erawh Manuel Neuer a dam tawh a, Germany international keeper hian hnai tak aṭanga Yussuf Poulsen ball tauh chu a dang hman - goal ngat se chuan inkhel kalhmang a dang thei ang. Joshua Kimmich pawhin Leipzig forward Timo Werner goal khung tur chu a tackle hman chiah chiah a, Bayern an vannei.
Lewy nge nge
Bayern Munich goal khung khawl Lewandowski-a'n minute 29-naah a class san zia pholangin David Alaba cross chu mawi zetin a tauh lut.
Goal luh hnuah Bavarians an insiamrem a, team ṭha zawk an ni tawh. Kingsley Coman chuan keeper a bum a hnuah goal zawnah pet mah se goalline aṭangin Leipzig defender Ibrahima Konate-a'n a tauh chhuak hram a, first half-ah a goal belh lo. Leipzig-in counter attack-ah Emil Forsberg hmangin chance ṭha an nei a, Swedish winger hian keeper Neuer chauh a hmachhawn hnuah goal-ah a chantir lo. Bayern khel ṭha zawk mah se goal hnihna luh hma chu an dinhmun a him lo.
Minute 78-naah Coman-a'n box chhungah ball kang lai chu fing taka la thlain mawi zetin goal kilah a khung. Bayern-in nomawi an chawi dawn tih a chiang nghal a, Lewandowski chuan 'cool' zetin minute 85-naah chak nemnghehna goal khungin 3-0 in an chak.
Mangṭha Roberry
Bayern tan Arjen Robben leh Franck Ribery te bench aṭangin an lut a, German club tana an match hnuhnung ber a ni. French forward Ribery hian match 425 khelh sakin nomawi 24 a chawipui a, Robben hian match 309 khelin nomawi 21 a chawi ve bawk.
Bayern legend pahnih hian contract thar an ziah tawh loh avangin Bavarians tan hian an khel dawn tawh lo a, hmuhnawm taka football khel ṭhin Robben leh Ribery te inkawp 'Robbery' hmuh tur a awm dawn tawh lo. Season tawp ruala German club chhuahsan tur Brazilian defender Rafinha erawh final-ah hian a inlan lo a, Bayern tana a inlan hnuhnung ber chu May 11-a RB Leipzig an hmachhawn kha a ni.
Kovac a lawm
Bayern Munich manager Niko Kovac chuan, "A êng zawng thlir ṭhin kan ni a, mumang rama cheng kan ni lo. Tlawm duh loin beiseina nen kan bei hram hram a, a rah kan seng ta," tiin hlawhtling turin hun harsa tak an paltlang thu a sawi.
Croatian manager Kovac chuan, "Season kan khar dan a lungawi thlak a, hun hautak zet kan paltlang avangin tunah chuan chawlh ka mamawh. Kar hnih thum kan han hahdam ang a, season thar atan ngaihtuahna kan seng ṭan ang," tiin season an khar danah a lawm hle.