Valencia ngam lotu Barca vullai a chuai

Barcelona-in Spanish football-a nomawi sang pahnih chawi an tumna chu a thamral a, Inrinni zan khan Copa del Rey final-ah Valencia chu 1-2 in an ngam lo. 

Catalan club tan Lionel Messi chuan Valencia laka a goal 28-na khung mah se a team tana nomawi chawi chhuak turin a tling tawk lo a, Kevin Gameiro leh Rodrigo goal hmangin Valencia an champion. 

Barcelona-in an beisei ber Champions League semifinal bak an thleng zo lo a, La Liga-ah champion mah se Copa del Rey nomawi an thlauh zui - coach Ernesto Valverde dinhmun chu sawi zui hlawh ber a ni. 

Gameiro & Rodrigo 
Minute 21-na lekah Valencia-in goal hmahruai an khung a, Gameiro ke aṭanga chhuak goal 'cial bik a ni. Jose Gaya ball siamsak chu French forward hian mawi zetin Jasper Cillessen man phak rual lohin a khung. 

Minute 12 a liam a, goal khungtu chu Valencia bawk an ni. Barca tlarhnung tana hnawk tluan chhuak zak Rodrigo chu Carlos Soler ball cross nang fuh turin ṭha zetin a tlan lut a, a hun ṭha neih goal-ah a chantir. Valencia-in goal hnih khung tura tlarhnung aṭanga ball an vawrh chhuah dan chu Barcelona tlarhnungin an dang thei lo a, football khel ṭhinte tan chuan inzirna tham a tling.

Spanish striker hian an goal hmasa ber luh hma hian chance duhawm a nei bawk a, Barca defender Clement Lenglet chetsual zara a shot chu Gerard Pique chuan line aṭangin a lo pet chhuak hman. 

Messi & beiseina
Barca-in goal hnih an chhuah hnuah Messi a inlar a, mahse Argentine forward chance neih hmasak ber chu Valencia keeper Jaume Domenech chuan ṭha zetin a dan sak. 

Messi a beidawng lo - minute 73-naah Pique-a post tauh per let lehlam chu goal-ah a chantir a, Barca fan-te tan beiseina a siam. Mahse, Barca aiin Valencia bawk an hlauhawm chhunzawm a, Catalan club leh Messi 'day' a ni lo. Goncalo Guedes chuan goal khungna remchang vawi hnih a rawn nei a, kum 22 mi forward vanduai ṭum ni lo se Barca hi si hnih dang phurh belh thei an ni. 

Valverde & Barca
Barca fans tam takin Valverde chhuahtir an duh a, Spanish coach duh lohna thawm a ri ring hle - Barca president Josep Maria Bartomeu chuan a coach hi a chhan nghal.

Bartomeu chuan, "Ernesto hi kan coach a ni a, season thar atan contract a la nei tih hi ka sawi fo tawh a ni. Kan chak loh hi coach mawhphurhna niin ka hre lo," a ti a, Valverde chhan chungin players a dem. Valverde chuan, "Coach rilruah chuan hnehna chan loh chuan chona thar hmachhawn zel hi a lian ber a, club tan chuan tlawm hi a hrehawm em em ang tih ka pawm," a ti a, Nou Camp chhuahsan a la ngaihtuah lo. 

Mihlim Marcelino
Valverde leh Marcelino thawnthu a in ang lo. Valencia coach hi December-a fan-ten bang tura an duh kha a ni a, relegation an hnaih hle - season a tawp meuh chuan Champions League khel turin an tling a, Europa League semifinal an thleng a, Spanish Cup-ah an champion ta bawk. 

Marcelino chuan, "Duhawm lo takin kum bul kan ṭan a, harsatna karah pawh ka player-te an beidawng lo. Vawiinah hian min en ta che u, an vaia min puihna zarah nomawi ka chawi ta a nih hi," tiin a player-te a fak thiam hle. Valencia captain Dani Parejo chuan, "Valencia mi ka nih hnua hun duhawm ber chu a ni. He hmunah hian kum riat ka awm tawh a, harsatna tam tak kan tawk. He club hian hlim em em a phu a ni," tiin a sawi.