Chhinga Vengin champion Trau an hneh

2nd Division League-ah Trau FC an champion a, amaherawhchu Manipur club hi Mizo club Chhinga Vengin match tawp berah 2-1 in an hneh.

Chhingcows hian an match hmasa bera Trau FC an hneh loh avang leh khualmuala Lonestar Kashmir an inhnehtawkpui avangin Inrinni tlaia match hnuhnung ber khelh a nih hian Manipur club hi an champion tawh.

Amaherawhchu MPL club hian beisei tur an nei lo chungin tha an thlah duh lo a, Khuman Lampak Stadium-ah MC Malsawmzuala (33') leh Lalliansanga (40') hmangin hma an hruai. Mualneitu Trau FC-in minute 66-naah Ngangbam Naocha Singh hmangin siphurh an sut ṭhen a, goal dang erawh a luh belh lo.

Inkhel boruak a sang a, minute 73-naah goal khungtu MC-a leh Trau player Shahabaaz Khan te chu hnawhchhuah an ni. Manipur club hian point 15 an hmu a, Chhingcows hian point hnih chauhin an pha lo. Lalsangzuala Hmar hote hian final round lut turin Trau FC chungah an awm a, amaherawhchu final round-ah bul ṭan fuh loin Manipur club lakah an tlawm nghal a, I League ticket an chan phah ta a ni.