Serchhip-ah Regional Development Centre hawng

Tun Inrinni khan Serchhip District bawrhsap Sangchhin Chinzahin badminton inzirna hmun Regional Development Centre (RDC) a hawng. 

Mizoram Badminton Asso-ciation, Mizoram sorkar, Tata Trusts leh Pullela Gopichand Badminton Academy ṭangkawp chuan Mizoramin badminton-a hma a sawn theih nan ruahmanna ṭha taka an duang. Mizoram hmun hrang hrangah Grassroots an kalpui a, heta inzir chhuak naupang ṭha bik hi Regional Development Centre-ah an awm chho leh ang.

Serchhip-a RDC chu Mizorama pahnihna a ni a, hemi hma hian Chanmari West, Aizawl-ah a hmasa ber hawn a ni tawh. RDC chungah High Altitude Training Centre (HATC) a awm leh dawn a, world class shuttler thlenga inzir theihna tur badminton inzirna hmun tur chu Sihphir-ah din mek a ni. RDC hi Serchhip District Badminton Assocation (SIDBA) in enkawl a, naupang 10 an awm mek. SIDBA hnuaiah hian kum ruk leh 14 inkar inzirna grassroots pawh kalpui a ni a, hetah hian naupang 58 an awm.