Turkey-in Netherlands an barakhaih

Netherlands-in World Cup 2022 khel tur zawnna match hmasa berah Turkey tlawh turin Ataturk Olympic Stadium an tlawh a, 4-2 in an tlawm. Group G inkhel dangah Norway-in Gibraltar 3-0 in an hneh a, Montenegro-in Latvia 2-1 in an hneh bawk.
Nilaini zan inkhelah hian Turkey tan Burak Yilmaz-a'n hattrick a siam bakah Hakan Calhanoglu-a'n goal khat a belh bawk a, Netherlands tana Davy Klaassen leh Luuk de Jong te goal khungin danglamna a thlen pha lo.
A goal tam
Netherlands-in Euro 2016 leh World Cup 2018 an khelh loh hnuah Ronald Koeman hnuaiah hma an sawn a, Nations League final hial thleng mah se final-ah Portugal lakah an vanduai. Koeman kaihhruaina hnuaiah Euro 2020 khel turin an tling bawk a, amaherawhchu Ducth coach hian Barcelona a pan san avangin Oranje-in coach atan Frank de Boer an lalut.
De Boer-a hnuaiah an result ṭha an chhunzawm thei lo a, World Cup qualifier-ah hian captain Virgil van Dijk inhliam vanga an chhawr theih loh avangin an buaina hi belhchhahin a awm. Turkey-ah mualneitu an che ṭha a, minute 15-na lekah Burak Yilmaz ball pet chu an dan pial avangin Netherlands keeper Tim Krul-a tan dan ngaihna a awm lo.
Yilmaz-a'n minute 34-naah chiang zetin penalty a khung a, Turkey-in goal hnihin hma an hruai. Halftime hma chiahin Matthijs de Ligt ball tauh chuan goalline a pelh hmain an pet chhuak hman a, Netherlands an vanduai.
Turkey tan Hakan Calhanoglu-a'n minute 46-naah box pawn chiah aṭangin mawi zetin a khung a, 3-0 a ni. Mikhual team tan Davy Klaassen leh Luuk de Jong ten minute 75-na leh 76-naah an khung avangin Netherlands-in beiseina thar nei mah se Lille striker Yilmaz-a'n minute 81-naah hattrick siam nan freekick aṭangin mawi zetin a pet goal.
Netherlands forward Memphis Depay-a'n injury time-ah penalty a hlah a, Turkey 4-2 in an chak. Oranje hian Latvia leh Gibraltar te an hmachhawn dawn a, chak ve ve a pawimawh ang.
Norway an chak
Victoria Stadium-ah Norway-in Gibraltar hneh turin harsatna an tawk lo a;  Alexander Sorloth, Kristian Thorstvedt leh Jonas Svensson te goal hmangin hnehna an chang.
Norway tan hian Martin Odegaard-a'n captain armband a hreng a, amaherawhchu Arsenal-a loan hmanga khel mek midfielder hi a ke rekah hliam a neih avangin first half tawp hma deuhin an thlak. Borussia Dortmund goal khung khawl Erling Braut Haaland pawhin bul ṭan mah se goal a khung lo a, minute 62-naah Joshua King-a'n a thlak ve bawk.