Khawih thiang lo Cristiano Ronaldo

Juventus vice president Pavel Nedved chuan an player duhlai Cristiano Ronaldo chu midang tana khawih thiang lo a nih thu a sawi a, a contract neih lai - June 30, 2022 thleng daih chu a hman zawh tur thu a sawi bawk.
Portuguese forward hma hun tur hi tun hnaiah an inrinsiak nasa, a club hlui Real Madrid emaw Manchester United lamah emaw zawk kir leh tur angin thu a thang nasa hle. Nedved a ṭawngchhuah takah chuan Turin khawpuiah a cham chhunzawm dawn niin a lang.
Juve lam thu
Player a nih laia Juventus tana thawh hlawk tak, inkhelh a chawlhsan hnu pawha club enkawl hna thawk chhunzawmtu Nedved chuan, "A contract neih lai hi June 30, 2022 thleng daih a ni, a cham ang. Ka ngaihdan chuan Cristiano hi khawih chet thiang lo a ni," a ti.
Old Lady hian beisei angin season an hmang lo a, an result a ṭhat tawk loh vang hian player bakah manager Andrea Pirlo chu sawisel hlawh langsar a ni - tawnhriat nei loa team enkawl hna a thawh avangin an sawisel hi a mak hran lo.
Coach chungchang sawiin Nedved chuan, "Pirlo hi Juventus coach a ni zel ang tih hi 100%-in ka chiang. Hun harsa chu kan hmang ngei mai, mahse thil tum fel tak kan neih turah hmalam kan pan mek a, chumi atan chuan Andrea a pawimawh," tiin a sawi.
Ronaldo lak chhan
Juventus hian 2011-12 season aṭang khan kum tin Serie A title an la ziah, harsatna lian tham an tawk ngai meuh lo. Mahse, Italy ram chhunga roreltu nih ringawt an duhtawk lo - 1996 hnua a vawi khat nan Champions League nomawi chawi an duh.
Kum 2018 nipui lai a ni a, khatih laia kum 33 mi Ronaldo chu Old Lady hian man to takin an lalut a, player dang zawng aia tam fal nalh hlawh pe turin inremna an ziak bawk. Real Madrid tana UCL title vawi li la thei a nih avangin ani kher an thlang hi a mak hran lo.
An duh Ronaldo chu an la ta ngei a, beisei pawh an nei sang hle. Amaherawhchhu an duh tak an neih hnu hian season thum UCL an khel tawh; 2018-19 season khan quarterfinal an thleng, tun hnai season hnihah erawh last 16 an paltlang zo ta lo a ni.
A nghawng
Juventus hian an duh ber Champions League nomawi chu Ronaldo ho pawhin an la thei rih lo, an forward chhuanvawr hi kum 36 mi a ni tawh si - season thar lo awm turah hian an la ring zui ngam ang em? tih chu zawhna lian tak a ni.
Serie A season kal laiah Ronaldo-a'n match 24 a khelh aṭangin goal 23 a khung, a theihna sanzia chu sawi nep theih a la ni lo. Mahse, mimal angin che ṭha viau mah se a team hi league table-ah pathumna a nihpui mek.
Season kua zet an kawl tawh 'Scudetto' hloh thei dinhmunah an ding mek. Season hnuhnung lam an thlirkir a nih chuan tun hma lama an lak ṭhin Coppa Italia an hloh bawk, league-ah an champion lo a nih chuan sawi zui tur a tam dawn tih a chiang.
Real an inhawng
Porto hneh loa Juventus an tlak chiah khan Ronaldo hi chhuak tur angin media lamin an ziak nasa nghal hle. Real Madrid manager Zinedine Zidane ngei pawh a player hlui hi laklet a tum leh tum loh zawhna an zawt fo bawk.
Zindane chuan, "Thil thleng thei a ni," tiin a lo sawi zauh tawh a, a ṭul a nih chuan Ronaldo laklet a hreh lo tih a hriat theih. Spanish club lian hian Ronaldo awm loh hnuah hmasawn lam an pan thei bik vak lo, heivang hian indawrna an neih mai pawh a rinawm hman hle.
Tunah chuan Juve vice president a rawn ṭawng chhuak tawh a, an player chelh ngei an duh. Amaherawhchu hlawhtlinna chan châka tuihal reng Ronaldo hian chhuah mai a duh ang em? tih chu zawhna lian tak a ni - nipui bazar tingaihnawmtu a ni ngei ang.