Japan-ah Olympic meichher an chhi ta

Tokyo Olympic meichher chu nimin khan Japan rama khawpui pakhat Fukushima-ah chhit kai a ni a, an ram chhungah ni 121 chhungin mi hrang hrang 10,000 zetin an tlan kualpui dawn.
Nikum khan Tokyo Olympic hi neih tura tih a ni, mahse Covid-19 vangin kum khatin sawn tlai a ni. Kum dangah chuan meichher hi khawvel hmun hrang hrangah phurh kual a ni ṭhin, kuminah chuan hrileng vang bawk hian a tih dan phung pawh thlak a ngai.
Infiamna khawmpui lian hi July 23 aṭanga neih ṭan a ni dawn, inelna hawn ni hian meichher dahna hmun tur bika an buatsaih chu a thleng ang a, mei hi mit loin inelna neih chhung zawng chu chhit chhunzawm a ni ang.
Tokyo 2020 chief Seiko Hashimoto chuan, "Olympic meichher hian hun thim tak kara khawvar lo awm tur chu a entir. Hun bi neia pangpar mawi tak par ang a ni a, buaina leh harsatna ten chim buai mah se par a ṭhulh chuang lo.
"Infiamna khawmpui lian kan thlen tur avang hian harsatna hrang hrang chu kan tawk ngei mai, mahse keini chuan a eng lamin thil kan thlir zel," a ti. Coronavirus hlauh vangin Japan mipui tam takin Olympic hi a hun sawn leh emaw, ṭhulh mai emaw an duh - mahse an kaltlangpui dawn.