Own goal hmangin Portugal chak hram

Portugal-in World Cup khel tur zawnna match hmasa berah FIFA ranking-a 108-na Azerbaijan an mikhual a, 1-0 chauhin an chak a, goal awmchhun hi Maksim Medvedev-a'n an lama tih luh a ni.
Group A inkhel dangah Serbia-in Republic of Ireland 3-2 in an hneh a, team nga an awm avangin Luxembourg an la awl thung. Portugal hian March 17, Inrinni zanah Serbia an hmachhawn dawn a, inkhel pawimawh a ni ang.
Portugal an vannei
Juventus Stadium, Turin-a inkhelah Cristiano Ronaldo-a'n goal a khung lo a, team nem Azerbaijan laka goal a khung a loh avangin ram tana goal khung tam ber Ali Daei record goal 109 khum turin hun a mamawh rei phah ang.
Ronaldo hian Portugal tan goal 102 a khung tawh a, Serbia leh Luxembourg an hmachhawn hunah goal khung ngei a tum ang. Fernando Santos hote hian inkhel an thunun a, goal chance pawh ngah mah se Azerbaijan keeper tan hna harsa an chhawp thei lo.
Goal awmchhun hi minute 37-naa lut a ni a, goalkeeper Shahrudin Mahammadaliyev-a'n hnek chhuak turin defender Maksim Medvedev a tih per avanga lut a ni.
Keeper Mahammadaliyev hian Manchester United midfielder Bruno Fernandes leh Atletico Madrid forward Joao Felix te goal khung tur a dansak a, Portugal 1-0 chauhin an chak.
Serbia tan Mitrovic
Belgrade-ah Alan Browne hmangin Republic of Ireland-in minute 18-naah goal khung hmasa mah se Serbia-in Dusan Vlahovic hmangin minute 40-naah an sut. Serbia tan captain Dusan Tadic a che ṭha a, danglamna thlentu tak erawh substitute Aleksandar Mitrovic a ni.
Fulham striker Mitrovic hian minute 68-naah hmahruaina goal a khung a, minute 75-naah khung belh lehin kum 26 mi Mitrovic hian dinhmun ṭhaah Serbia a dah. Mualneitu goal thum hi captain Tadic-a siamsak vek a ni.
Minute li chiah a awm tawh tihin James Collin-a'n Republic of Ireland tan a khung ve leh a, scoreline ti mawitu chauh a ni. Serbia 3-2 in an chak a, Inrinni zanah Portugal an mikhual lehnghal ang.