Venus leh Kerber an liam nghal

French Open 2019 chu Pathianni zan aṭangin khelh ṭan a ni a, hmeichhe singles champion tura rinkai zinga mi Angelique Kerber leh Venus Williams te chu hneh nei loin an zinkawng a tawp nghal.

Paris-a inkhelah seeded pangana Kerber hi world number 81 Anastasia Potapova lakah 6-4, 6-2 in a tlawm a, Wimbledon champion lai hi player langsar zinga tla hmasa ber a ni. German nula Kerber chuan, "Ka kerekah hliam ka nei, mahse ka inkhelh tluan theih avangin kha chu chhuanlam a tling lo," tiin hliam nei chunga inelna a hmachhawn thu a sawi. Grand Slam vawi thum champion tawh hian tun hnaiah beisei a phak lo thei hle.

Seeded pakuana Elina Svitolina tan draw an neih hlima Venus Williams a hmachhawn dawn tih hriat kha thu hriat nuam a ni lo ang. Mahse, Svitolina hian Grand Slam vawi sarih champion tawh hi 6-3, 6-3 in a hneh. Kum 38 mi Venus hi a vanglai a liam tawh, 2017 khan US Open semifinal a khel tih mai loh chu Grand Slam inelna bikah third round paltlang a nei tawh lo a ni. Hnehna changtu Svitolina-i'n a match lehpekah world number 67 Kateryna Kozlova a hmachhawn leh ang.

First round inkhel dangah Garbine Muguruza pawhin fiahna a hmachhawn nghal, Spanish nula hian set a hloh hmasak zet hnuah American nula Taylor Townsend chu 5-7, 6-2, 6-2 in a hneh. Kum 2016 French Open champion Muguruza hian second round-ah chuan world number 172 Johanna Larsson a hmachhawn leh ang, Sweden nula Larsson hian Magdalena Rybarikova chu a lo hneh ve bawk a ni.

Seeded pahnihna Karolina Pliskova-i'n Madison Brengle 6-2, 6-3 in a hneh a, inkhel dangah season hmasa French Open pahnihna Sloane Stephens pawhin Japanese player Misaki Doi chu 6-3, 7-6 (7-4) in a hneh bawk.