ATK-ah Carl McHugh a kal dawn?

Indian Super League club ATK-in transfer bazar-ah thawm an neih belh zel a, Scottish Premiership club Mother­well defender Carl McHugh chu an lalut dawn niin media ṭhenkhatin an tarlang. 

McHugh hi kum 26 mi lek a nih avangin ATK hian an lalut thei a nih ngat chuan ISL-a transfer lian ber pawl a tling dawn a, Scottish league sang ber aṭanga rawn pem tur a nih dawn avangin a hlawh pawh a tlem chhe lo ang. 

England lama League One club Bradford City leh League Two club Plymouth Argyle tan pawha lo khel tawh defen­der hian Irish chanchinbu Donegal Daily hnenah India a pan mai theih thu hi a lo sawi tawh.

Republic of Ireland tana age level hrang hranga lo inlan tawh defender chuan, "Kum 26 mi lek ka la ni a, khawvel hmun dang hmuh chakna hian min hip em em reng a ni. England-ah League One-ah ka khel tawh a, League Two ka khel tawh bawk. 
"Thil thar tawn chakna hi keimahah a awm reng avangin India kal hi ka hnial lo," tiin a sawi a, he thuziak i chhiar meuh chuan ATK hian an lalut fel tawh hial mai thei. 

McHugh hi Mother­well-ah hian a tikimtu a ni satliah lo. Season hman zawh takah pawh khan match 34 a khelh sak a, June 2017 khan club captain atan ruat a ni hial. Mahse, tun season liam ta ṭan dawn khan captain a nihna aṭang hian a ban thu a puang a ni.