Hnehna nena bul ṭantu Federer

Roger Federer-a'n season thum hnuah French Open a khel ve leh a, a thiam a la theihnghilh lo. Swiss star hian a match hmasa berah Lorenzo Sonego hnehin first round a paltlang.

Pathianni zan Court Philippe Chatrier-a inkhelah Federer hian darkar khat leh minute 41 chhungin Sonego hi a hneh. Kum 37 mi Federer-a'n Nilaini zanah a match hnihna a khel leh dawn a, world number 145 Oscar Otte nen an inhmachhawn leh dawn a ni.

Hello Paris
Grand Slam vawi 20 champion tawh Federer-a'n 2016 khan a hnungzâng na vangin French Open a khel lo a, tun hnai season hnuhnung pahniha a inlan loh chhan erawh grass court lama a khelh ṭhat theih nan hahchawlhna hun neih hnem a duh vang a ni. Kuminah Federer a rawn kir a, tennis court a rawn lut chu Paris khawpuia a inkhel en tura rawn kal khawmte chuan ding chungin an lo lawm lut a, inkhelh zawha a chhuak tur pawh zahna chibai buk chungin an thlah.

Federer chuan, "Clay-ah ṭha takin ka khel thei tih ka hria, match hmasa berah set hloh loa hnehna ka chang thei hi ka lawm hle. French mipui min lawmtute chungah lawmthu ka sawi takzet," a ti a, inelna lian dang ang bawkin first round a harsat thu a sawi bawk.
 

Federer a chungnung
Seeded pathumna Federer-a'n chak tura rinkai nichungin Sonego a hmachhawn, rinlawk ang ngeiin set hmasa berah a service hmasa pahnih chhuhsak nghalin 4-0 in a chungnung a, a tawp thlengin harsa lutuk loin hnehna a chang. French Open vawi khat champion tawh Federer chuan, "Break point vawi hnih ka chhawr ṭangkai nghal avangin inkhelh a awlsam phah hle. Kan ball vuakin duhthu la sam vek lo mah se a tlangpui thuin a ṭha thawkhat," a ti.

Swiss tlangval hian a service neih ṭhat a la chhawm nung a, service vawi khat hloh mah se a khingpui hi vawi nga a chhuhsak theih avangin buaina a tawk lo. Set thum chhungin attacking game hmuhnawm a lan chhuahtir tluan chhuak zak a ni.

Tsitsipas a tlang
Seeded parukna Stefanos Tsitsipas-a'n second round lut turin harsatna a tawk bik lo, Greek tlangval hian world number 110 Maximilian Marterer chu 6-2, 6-2, 7-6 (7-4) a hnehin first round a paltlang.

Kum 20 mi Tsitsipas hi tunlai player beiseiawm berte zinga mi a ni a, January thlaa khelh zawh tak Australian Open-ah pawh khan Federer hnehin semifinal hial a thleng - second round-ah chuan world number 92 Hugo Dellien nen an intawng ang. An tlang chho zel a nih chuan quarterfinal-ah Federer nen an inhmachhawn leh thei dawn a ni.

Seeded parukna Tsitsipas chuan, "Tournament ka khelh dangte nen a inang lo hle, hetah chuan ball a kal muang a, player kan che rang tawk lo bawk. Mahse, Paris hi nuam ka tihna hmun a ni," a ti. Tsitsipas hian tun season clay court bikah match 13 hnehna a chang tawh.

French Open inbuatsaih nan hian Madrid Open-ah final a lut a, Spain khawpuia inelna an neih ṭum hian clay court-a inkhel thiam bik Rafael Nadal leh Alexander Zverev te a hneh theih avangin Paris-ah pawh hian player enbik tur zinga mi a ni.

Inkhel dang
Chak tura rinkai dang seeded pasarihna Kei Nishikori pawhin harsa lo takin world number 153 Quentin Halys chu 6-2, 6-3, 6-4 in a hneh a, Roland Garros quarterfinal vawi hnih khel tawh hian khawtual tlangval Jo-Wilfried Tsonga leh Peter Gojowczyk te inkhela a chak zawk a hmachhawn leh ang.

Croatian tlangval Marin Cilic pawhin Italian player Thomas Fabbiano 6-3, 7-5, 6-1 in a hneh. US Open champion hlui Cilic hian Janko Tipsarevic hnehtu Bulgarian world number 47 Grigor Dimitrov a hmachhawn lehnghal dawn avangin second round a awlsam dawn lo.

Kum 37 mi Nicolas Mahut-a'n a beisei phak loh result a tawng thung, wildcard hmanga inlan khawtual player hian seeded 16-na Marco Cecchinato chu 2-6, 6-7 (6-8), 6-4, 6-2, 6-4-in a hneh a, season hmasa semifinalist hi a match hmasa berah a mualpho chiang hle.