Ranieri leh Rossi ten Roma an mangṭha

AS Roma chuan Serie A an match hnuhnung berah hnehna chang mah se Champions League khel turin an tling zo lo a, UCL ticket an neih loh rilru na ti zual turin Parma an hnehna inkhel kha coach Claudio Ranieri leh captain Daniele de Rossi te tana hun hnuhnung a ni.

May thlatir khan kum 35 mi De Rossi-a'n season 18 a chamchilh tawh Roma a chhuahsan tur thu hi a tichiang tawh a, Italian club tan hian match 458 a khelh aṭangin goal 43 a khung - a kalna tur la chiang lo mah se Boca Juniors emaw Major League Soccer lam emaw a hawi tura ngaih a ni.

Italy tana World Cup chawi tawh Rossi chuan, "Ka naupan lai thlalak ka en a, Roma jersey ka neih tirh laia ka hlim zia te kha ka ngaihtuah let. Hun rei tak ka chamchilh tawh ka chhuahsan hun a thleng ta a, ka kalsan tur zawng zawng ka ngaihtuahin lung a chhe duh hle.

"Player ropui bik Francesco Totti hnen aṭangin captain armband hlan chhawn ka ni. Footballer ropui chungchuang bik a ni a, season 16 chhung zet ka mi ngaihsan nen kan khelhna hmun a nih avangin a hlu zual, kei aia vannei hi an awm bik chuang lo ang," tiin Totti nena an hun hman tawhna hmunin a lung a tih len tur thu a sawi.

Roma chuan an player chhuak tur thlahna thuchhuah siamin, "Danie kan henah i rawn kir duh a nih chuan i tan hmun a awm reng. Kan captain i ni kumkhua tawh dawn," tiin a sawi. March thla khan Roma hian Eusebio di Francesco an ban a, a hmun ruak luah turin Ranieri an lalut. Leicester City a enkawl laia Premier League nomawi chawi tawhtu hian tun season tawp thleng atan Roma hi a zawm a, a contract pawh sei a ni lo.

Kum 67 mi Ranieri-a'n player a nih laiin Roma hi a senior career bul ṭanna a ni a, inkhelh a chawlhsan hnuah team enkawl hna thawkin 2009-2011 inkar khan Italian club hi a enkawl tawh bawk. A club hmangaih hi UCL khelhpui phak lo mah se stadium chhunga fans tam tak pungkhawm chuan ui leh zah tak chungin an thlah.