Magpies-in neitu thar an nei hnai

Newcastle United neitupa Mike Ashley chu UAE sumdawng hausa tawntaw Sheikh Khaled bin Zayed Al Nahyan nen a club hralh tumin an indawr mek a, indawrna hi a hlawhtling a nih chuan Premier League club sum seng 'na' kan hmu leh dawn tihna a ni thei ang. 

Magpies lei tumtu Sheikh Khaled hi Manchester City neitu Sheikh Mansour chhung hnai a ni a, nikum khan Liverpool chu pound tluklehdingawn hniha lei tumin a lo dawr hlawhchham tawh. Bin Zayed Group chuan Magpies nen hian inremna an nei tawh niin an sawi a, a hma thei ang bera engkim tihfel an beisei thu an sawi bawk. Khawthlang media ten an tarlan dan chuan Newcastle hi pound maktaduai 350-a hralh a ni ang. 

Sports Direct neitu Ashley hian kum 2007 khan Newcastle hi pound maktaduai 134.4-in a lei a, Magpies neitu a nih chhungin vawi hnih ngawt chu division hniam lamah an relegate. Fan-te nen an inkarah boruak a awm reng avangin Ashley hian Magpies hi 2008, 2009 & 2017 khan hralh a lo tum tawh a, January 2018 khan hmeichhe sumdawng hausa Amanda Staveley nena an indawrna chu a lo tlawlh tawh.