Madrid khawpuiah Morata cham a duh

Atletico Madrid-a loan-a khel mek striker Al­varo Morata chuan Spanish club-ah hian cham hlen a duh thu a sawi a, thla 18 khel tura a chhuahsan Chelsea fans tan thu hriat nuam a ni kher lo ang. 

Kum 27 mi Morata hian January khan Atletico hi loan-in a zawm a, match 17-a khelh sakah goal ruk a khung tawh. July 2017 khan Chelsea player manto ber ni turin London club hi pound maktaduai 60-in a pan a, mahse Real Madrid striker hlui hian match 72-ah goal 24 chiah a khung sak. 

Atletico youth team player hlui Morata chuan, "He hmuna cham zel ka duh tihah hian ka chiang em em a, chhuahsan lam ka ngaihtuah lo. Professional footballer ka nih anga ka hun zawng zawng chu he hmunah hian hman ka duh a ni," a ti. Morata chuan thu­tlukna erawh a thu a nih loh thu sawiin, "Ka thu chu ni se contract thar ka ziak tawh ang. Mahse, contract thilah hi chuan chinfel ngai a tam em em ṭhin a ni. He hmun rawn kal tur hian theihtawp ka chhuah a, cham zel tur pawhin ka bei ang," a ti zui a, Madrid khawpui chhuahsan a tum lo hle.