Foden & Maddison telna England U21

June thlaa kum 21 hnuai lam footballer puala neih tur Euro 2019 atan England-in squad an puang a, player koh zingah Manchester City midfielder Phil Foden leh Leicester City player ṭhangduang James Maddison te chu an tel. 

Crystal Palace tana season duh­awm tak hmang zo hlim right-back Aaron Wan-Bissaka chu koh zingah a tel a, Chelsea player pathum Tammy Abraham (loan - Aston Villa), Mason Mount leh Fikayo Tomori (loan - Derby)  te pawh koh an ni. 

Maddison hi nikum khan a vawi khat nan England senior team tana inlan tura koh a ni tawh a, Three Lions hian June-ah UEFA Nations League finals khel dawn mah se Foden leh Wan-Bissaka nen Gareth Southgate-a'n a ko lo. 

England coach Southgate-a'n player pathum a koh loh chhan hi Euro 2019-ah hian tawnhriat nei phawt se a duh vang a ni a, Under 21 team-a hmun pawimawh changa major tournament an hmachhawn a duhsak. 

Under 21 Euro 2019 hi Italy leh San Marino-in an inthlen ṭawm dawn a, June 16 aṭanga khelh ṭan tur inelnaah hian England hi Group C-ah France, Romania leh Croatia te nen an awmho.