Arsenal hmaah Chelsea

Zanin dar 12:30 hian Europa League final chu Azerbaijan khawpui Baku-ah khelh a ni dawn. Premier League club lian pahnih Arsenal leh Chelsea ten nomawi an inchuh ang, inkhel result hian thawnthu tam tak a herchhuahpui dawn avangin ngaihven a hlawh zual.

Gunners tan nomawi hian Champions League ticket a keng tel dawn a, Blues manager Maurizio Sarri tan nomawi lian hmasa tur a nih theih bakah a hma hun kal zel tur hril thei thil a ni bawk - Petr Cech leh Eden Hazard te tana hun pawimawh a nih theihzia chu football ngaina tute chaw tui a tling.

Emery Arsenal
Arsene Wenger-a'n season 22 hnuah Arsenal a chhuahsan a, a hmun ruak luahtu chu Unai Emery a ni. Spanish manager hian a club thar hi league-ah pangana a nihpui - zanina Chelsea an hneh loh a nih chuan season tharah Europa League an khel nawn ang.

Sevilla a enkawl laiin Emery-a'n Europa League nomawi vawi thum a zawnin a chawi a, a champion hnuhnung ber 2015 khan Jurgen Klopp-a enkawl Liverpool chu Switzerland khawpui Basel-ah an hneh. Kumina final lut tur hian Napoli leh Valencia an pet chhuak tawh a, Blues hneh turin theihna an nei. 

Sarri Chelsea
Antonio Conte thlaktu Maurizio Sarri-a'n a nomawi chawi theih hmasa zawk League Cup chu Manchester City lakah a hloh tawh, league champion an hneh loh hi chu a mak lo. An aia hniam zawk Arsenal erawh an hlau dawn lo.

Italian manager hi Juventus nena sawizawm mek a ni. Tun thlatir khan Sarri hian, "Thla 10 chhunga ka hna thawh hi match khat leka a nihna teh chi a ni lo, Europa League final hian ka hma hun a hril lo ang," tiin sawi mah se, Gunners nen an inkhelh zawh hunah club thuneitu lam nen an inbe dawn tho.

Blues mawina Hazard
Eden Hazard-a'n Premier League goal 15 a khung bakah a ṭhiante tan assist vawi 15 nei chungin season a khar. A sulhnu chhuanawm viau mah se nomawi tel lo chuan a lawm a kim lo. Hazard chuan, "Ka match hnuhnung ber a nih dawn chuan nomawi chawi ka duh," tiin thu lakkawih theih tur tak a sawi.

Belgium international hi a khelh fuh ni chuan Chelsea inkhel ti mawitu leh an chakna thahrui pawimawh a ni. Mahse, Real Madrid nen sawizawm a ni reng a, a hma hun a sawi chian duh loh avangin fans tam tak an thlamuang lo.Transfer boruak dahṭhain zaninah chuan Hazard hi Arsenal tlarhnung chhaih buai turin a inlan dawn a, tlarhmaah Olivier Giroud emaw Gonzalo Higuain an awm thei dawn - tlarhnung nem ve tak, league goal 55 chhuahtu Gunners tan ven an hautak dawn hle.

Hliam vangin N'Golo Kante a inlan thei dawn lo. France international a awm loh chuan Jorginho hna thawh tur a tam dawn a, a mawhphurhna a sang zual ang. Italy international hi Sarri player duh bik a ni a, Italian manager-in Napoli aṭanga a chhawm luh hi nomawi lakpui atan a tlak em tih a lang ang.

Auba leh Laca
European manager tam zawkin striker pakhat hman an uar a, Arsenal manager Emery pawhin a hmang ṭhin. Mahse, Pierre-Emerick Aubameyang leh Alexandre Lacazette te hi a player neih ṭhat an nih avangin an tan khelhna hmun a awm.

Gabonese striker Aubameyang-a'n league goal 22 a khung bakah European football-ah pawh a hriam tawkzia lantir nan semifinal-a Valencia an hneh ṭumin khualmualah hattrick a siam - Laca nen season kal laia an goal khung belhkhawm chu 50 a tling.

Kum 29 mi Auba chuan, "Season duhthusam chu a ni lo maithei, mahse kan thlen chinah hian ka hlim. League-ah kan nih tum kan phak lo a, tunah chuan nomawi chawi kan tum leh ang," a ti. Auba leh Lacazette te inkawp chu defender rinrawl Antonio Rudiger chhawr thei lo tur Blues tan mut titui lo tham an ni ang.

Gunners hian politics buaina vangin Henrikh Mkhitaryan an hruai tel thei lo a, season thara Juventus pan tur Aaron Ramsey chu hliam vangin a inlan thei dawn lo bawk - inkhel boruak sang leh pawimawhah tawnhriat ngah Mesut Ozil chungah mawhphurna a sang dawn.